မိုင်းရူပ၊ ဖေဖော်ဝါရီ ၂၅ ရက်
မန္တလေးမြို့ အိုးဘိုထောင်မှာ နိုင်ငံရေးအကျဥ်းသား ကိုအောင်ထွန်းဆိုသူဟာ ဆေးကုသခွင့် လုံလုံလောက်လောက်မရတာကြောင့် သေဆုံးသွားတယ်လို့ မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက်- PPNM ဆီက သိရပါတယ်။
ကိုအောင်ထွန်းဟာ စစ်ကောင်စီတပ်ရဲ့ ဖမ်းဆီးခြင်းမခံရမီ ကျန်းမာရေးကောင်မွန်သူတစ်ဦးဖြစ်ပြီး အိုးဘိုထောင်မှာ ဖမ်းဆီးထိန်သိမ်းခံရပြီးနောက် ခန္ဓာကိုယ်မှာ အနာတွေပေါက်ပြီး ထောင်ဆေးရုံမှာ တစ်ပတ်ကြာဆေးကုသမှုခံယူပြီးနောက် ပြီးခဲ့တဲ့ ဖေဖော်ဝါရီ ၁၈ ရက်မှာ သေဆုံးခဲ့တာ ဖြစ်ပါတယ်။
“ရောဂါအခံ မရှိဘူးခင်ဗျ။ အနာတွေ ပေါက်တယ်လို့ သိရတယ်။ အဲအနာမှာ ပိုးတွေဝင်တယ်လို့ ကျနော်တို့ သိရတယ်။ထောင်ဆေးရုံမှာပဲ ဆုံးသွာတဲ့ အခြေအနေ ဖြစ်ပါတယ်” PPNM ရဲ့ တာဝန်ရှိသူ ကိုသိုက်ထွန်းဦးက ရွှေဖီမြေကို ပြော ပါတယ်။
ကိုအောင်ထွန်းဟာ ပြီးခဲ့တဲ့ ၂၀၂၂ ခုနှစ် ဧပြီလ (၁၅)ရက်မှာ မန္တလေးတိုင်း အမရပူရမြို့နယ်မှာ ရဲတပ်ဖွဲ့ရဲ့ ဖမ်းဆီးတာခံရပြီး အမရပူရတရားရုံးမှာ ထောင်ဒဏ်(၃) နှစ် ချမှတ်ခံခဲ့ရကာ အိုးဘိုအကျဉ်းထောင်မှာ ထိန်းသိမ်းခံရတာ ဖြစ်ပါတယ်။
လက်ရှိ နိုင်ငံတဝန်းက အကျဥ်းထောင်တွေမှာ နိုင်ငံရေးအကျဥ်းသားတွေကို ဆေးကုသခွင့် လုံလုံလောက်လောက်မပေးနိုင်တဲ့ အခြေအနေဖြစ်နေပြီး စစ်ကောင်စီနဲ့ ထောင်အာဏာပိုင်တွေဘက်က ဆေးကုသခွင့်ပေးဖို့ တောင်းဆိုချက်တွေကို နားထာင် ပေးဖို့ လိုအပ်တယ်လို့ ကိုသိုက်ထွန်းဦးက ဆိုပါတယ်။
ပြီးခဲ့တဲ့ ၂၀၂၄ ခုနှစ် ၁ နှစ်အတွင်း စစ်ကောင်စီလက်ချက်ကြောင့် နိုင်ငံရေးအကျဥ်းသား ၃၁ ဦးသေဆုံးခဲ့တယ်လို့ မြန် PPNM က ပြီးခဲ့တဲ့ ဒီဇင်ဘာ ၃၁ ရက်မှာ ထုတ်ပြန်ထားပါတယ်။
သေဆုံးခဲ့ရတဲ့ နိုင်ငံရေးအကျဥ်းသားတွေထဲမှာ ကျန်းမာရေးစောင့်ရှောက်မှုမရလို့ သေဆုံးသူ ၂၂ ဦးနဲ့ ဥပဒေမဲ့ ညှဥ်းပန်းနှိပ်စက်ခံရလို့ သေဆုံးသူ ၉ ဦးဖြစ်တယ်လို့ ဆိုပါတယ်။
