အင်းငယ်၊ ဖေဖော်ဝါရီ ၂၅၊ ဗထူး
ရှမ်းပြည်တောင်ပိုင်း၊ ရပ်စောက်မြို့နယ်၊ ဗထူးမြို့ရှိ တပ်လေ့ကျင့်ရေးကျောင်းမှာ တပ်ကြပ်ကြီး ၂ ဦး အချင်းချင်းပစ်ခတ်မှု ဖြစ်ပွားခဲ့တယ်လို့ စစ်ဆေးရုံတွင်း သတင်းအရင်းအမြစ်တွေက ရွှေဖီမြေကို ပြောပါတယ်။
ပြီးခဲ့တဲ့ ဖေဖော်ဝါရီလ ၂၀ ရက်နေ့အတွင်း တောင်ကြီးမြို့ အခြေစိုက် အမှတ် ၃၅၇ အမြောက်တပ်ရင်းက (အမတ) တပ်ကြပ်ကြီး အောင်မြင့်နဲ့ ဗထူးလေ့ကျင့်ရေးကျောင်းက တပ်ကြပ်ကြီး မင်းဇော်ဦးတို့ဟာ အချင်းချင်း ပစ်ခတ်မှု ဖြစ်ပွားခဲ့ပြီး အောင်ပန်းမြို့၊ တပ်မတော်ဆေးရုံ ၂ (တဆရ – ၂) ကုတင် ၇၀၀ သို့ ပို့ဆောင်ခဲ့ရာမှာ ၂ ဦးလုံး သေဆုံးသွားခဲ့တာ ဖြစ်ပါတယ်။
CDM ဗိုလ်ကြီးဇင်ယော်က “စစ်မှုထမ်း လူမရလို့ မဟုတ်ပါဘူး။ ဗထူးတပ်နယ်ထဲက ဂိတ်တခုခုမှာ စုပေါင်းစပ်ပေါင်း သောက်စားကြရင်းနဲ့ ဖြစ်တာလို့ သိရပါတယ်။ အရင်ကလည်း ဘက်တံဆိပ် မတူရင် ဂိတ်ကြေးကောက်တဲ့ နေရာတွေမှာ ပြဿနာတွေက ဖြစ်နေကြပါပဲ။ ဒီကာလ အနားမရတော့ ဖိအားနဲ့ ပိုဆိုးတာပေါ့။ ၂ ယောက်လုံး တဆရ ၂ မှာ သေတာပါ” လို့ ပြောပါတယ်။
သေဆုံးသူ ၂ ဦးလုံးဟာ ဗထူးလေ့ကျင့်ရေးကျောင်းမှာ မွန်းမံသင်တန်း တက်ရောက်ဖို့အတွက် မကြာသေးခင်ကမှ ရောက်လာသူတွေ ဖြစ်တယ်လို့ သိရပါတယ်။
အဲဒီ သေဆုံးမှုကို စစ်ကောင်စီက သတင်းဖုံးဖိထားပြီး ဆေးထောက်ခံစာ အတုတွေနဲ့ ၉၆ ပါးရောဂါကြောင့် သေဆုံးတာလို့ဆိုကာ ဗထူးတပ်ဝင်းထဲမှာ ဝါဒဖြန့်ထားတယ်လို့ ဗိုလ်ကြီးဇင်ယော်က ဆက်ပြောပါတယ်။
“အချင်းချင်း ဖြစ်ပြီဆိုရင် တပ်ထဲမှာတောင် ပြန့်လို့မရဘူး။ အောက်ခြေ ဘာမသိရဘူး။ ဟိုတလောက ချင်းတောင်မှာ ရဲဘော်လေးတယောက်က အနိုင်ကျင့်ခံရလို့ ပြန်ပစ်တာ ၉ ယောက်လုံး တခါတည်း သေတယ်။ အဲဒါလည်း အရာရှိချင်းပဲသိတာ။ တခြားတပ်က မသိရဘူး”
အရင် အာဏာမသိမ်းခင်က စစ်ကောင်စီ လက်အောက်ခံ တိုက်ခိုက်ရေးတပ် (ခမရ)တွေကို ၆ လရှေ့တန်းထွက်ပြီး ၆ လနောက်တန်းမှာ အနားယူတဲ့စနစ် ကျင့်သုံးခဲ့ပေမယ့် လက်ရှိမှာ တပ်တွင်း လူအင်အားလိုအပ်ချက်တွေကြောင့် အနားမပေးတော့ဘူးလို့ တပ်တွင်းအရင်းအမြစ်တွေက ဆိုပါတယ်။
ဒါကြောင့် ဗထူးအပါအဝင် စစ်ကောင်စီ လက်အောက်ခံ တပ်ရင်းအများစုမှာ စိတ်ဖိစီးမှုများစွာနဲ့ ဖိအားဝင်လာပြီး တပ်ပြေးတာ၊ တပ်တွင်းပုန်ကန်မှု ဖြစ်တာ၊ အချင်းချင်းပစ်တာတွေ ဖြစ်ပွားနေကြတယ်လို့ စုံစမ်းသိရပါတယ်။
