အိုက်ပွီး၊ ဖေဖော်ဝါရီလ ၂၅ရက်၊ ငဖဲ
မကွေးတိုင်း၊ ငဖဲမြို့နယ်၊ လင်းတဲကျေးရွာက ဘုန်းကြီးကျောင်းကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်လို့ ချင်းအမျိုးသား နှစ်ဦးသေဆုံးပြီး ၁၀ ဦးထက်မနည်း ထိခိုက်ဒဏ်ရာရရှိခဲ့တယ်လို့ ဒေသခံတွေဆီက သိရပါတယ်။
အမ်း-ပဒါန်း ကားလမ်းမပေါ်က စစ်ကောင်စီတပ်ရဲ့ နတ်ရေကန်ဗျူဟာကုန်းကို အာရက္ခတပ်တော်(AA)နဲ့ တော်လှန်ရေးပူးပေါင်းတပ်တွေ ထိုးစစ်ဆင်တိုက်ခိုက်နေစဥ် လင်းတဲရွာကို စစ်ကောင်စီက မနေ့ ဖေဖော်ဝါရီလ ၂၄ ရက်၊ နေ့လယ်အချိန်မှာ လေကြောင်းကနေ ဗုံးသီးနှစ်လုံးနဲ့ တိုက်ခိုက်ခဲ့တာဖြစ်ပါတယ်။
“ရွာက နတ်ရေကန်စခန်းအောက်မှာ ရှိတာပါ။ တိုက်ပွဲဖြစ်တော့ စကစ စခန်းကနေ လက်နက်ကြီးကျည်တွေပစ်တာ၊ လေကြောင်း ဗုံးကြဲတာတွေရှိလို့ ရွာသားတွေက ဘုန်းကြီးကျောင်းမှာ စုနေကြတာ။ ဘုန်းကြီးဆိုတော့ ရှောင်မယ်အထင်နဲ့ နေကြတာပေါ့။ ဘုန်းကြီးကျောင်းကိုပဲ တည့်တည့်ဗုံးကြဲသွားတယ်။” လို့ ငဖဲဒေသခံတစ်ဦးက ရွှေဖီမြေသို့ ပြောပါတယ်။
လေကြောင်း ဗုံးကြဲတိုက်ခိုက်လို့ ချင်းအမျိုးသား နှစ်ဦးဟာ ပွဲချင်းပြီး သေဆုံးခဲ့ပြီး အမျိုးသမီး၊ ကလေးအပါအဝင် ၁၀ ဦးထက်မနည်း ထိခိုက်ဒဏ်ရာရရှိကာ ၎င်းတို့ကို မင်းဘူးခရိုင်ဆေးရုံကို ပို့ဆောင်ထားတယ်လို့ သိရပါတယ်။
ဒဏ်ရာရရှိသူတွေထဲမှာ အသက်အန္တရာယ် စိုးရိမ်နေရတဲ့ လူနာတွေရှိတာကြောင့် သေဆုံးသူ ထပ်တိုးလာနိုင်တယ်လို့ ဆိုပါတယ်။ ဒါ့အပြင် လင်းတဲကျေးရွာက ဘုန်းကြီးကျောင်းလည်း လေကြောင်း ဗုံးကြဲတိုက်ခိုက်ခံရတဲ့အတွက် ပျက်စီးသွားတယ်လို့ သိရပါတယ်။
လင်းတဲရွာဟာ အိမ်ခြေ ၁၀၀ ခန့်ရှိပြီး ချင်းလူမျိုးတွေနေထိုင်တဲ့ ကျေးရွာဖြစ်ပါတယ်။
ဖေဖော်ဝါရီလ ၂၂ ရက်နေ့ကလည်း နတ်ရေကန်လမ်းဟောင်းမှာ ချင်းကာကွယ်ရေးတပ် -အရှို နဲ့ စစ်ကောင်စီတပ်တို့ တိုက်ပွဲဖြစ်ပွားခဲ့ပြီး စစ်ကောင်စီတပ်ဖွဲ့ဝင် ခုနှစ်ဦး သေဆုံးကာ လက်နက် ၄ လက် သိမ်းဆည်းရမိခဲ့တယ်လို့ CDF-Asho က ထုတ်ပြန်ထားပါတယ်။
