လွေးထွေး၊ ဖေဖော်ဝါရီ ၂၅ ရက်၊ မြဝတီ
ထိုင်း-မြန်မာ နယ်စပ် မြဝတီမြို့ထဲကို ထိုင်းဘက်က စက်သုံးဆီ ရက် ၂၀ နီးပါးအကြာ ဖြတ်တောက်ခံထားရလို့ ဒီနေ့ ဖေဖော်ဝါရီ ၂၅ ရက်အထိ စက်သုံးဆီဈေး မြင့်တက်နေဆဲဖြစ်တယ်လို့ ဒေသခံ အမျိုးသမီးရဲ့ ပြောပြချက်အရ သိရပါတယ်။
ဒီနေ့ အထိ ဓါတ်ဆီနဲ့ ဒီဇယ် တစ်လီတာကို ၁၆၀၀၀ ဝန်းကျင်အထိ ဈေးရှိနေပြီး ဆီဆိုင်တွေနဲ့ နေရာအများစုမှာ အလွယ်တကူနဲ့ ပြန်ပြီး ဝယ်ယူလို့ရနေတယ်လို့ဆိုပါတယ်။
မြို့ခံ အမျိုးသမီးက “အခုအထိတော့ ဈေးမကျသေးဘူး။ ဒါပေမယ့် အရင်ကလိုတော့ ဝယ်ရမခက်တော့ဘူး။ ဈေးကြီးလည်း လိုအပ်နေတော့ ဝယ်လို့လွယ်တာနဲ့တင် ကျေးဇူးတင်ရမလို ဖြစ်နေတယ်” လို့ ပြောပါတယ်။
မြဝတီမြို့ထဲကို ထိုင်းဘက်က ပြီးခဲ့တဲ့ ဖေဖော်ဝါရီ ၅ ရက် ကတည်းက စက်သုံးဆီနဲ့ လျှပ်စစ်မီး တင်သွင်းခွင့်ကို ပိတ်ထားပြီး လက်ရှိအချိန်အထိ နယ်စပ်ဒေသမှာ ထိုင်းဘက်က လုံခြုံရေးတင်းကြပ်ထားပြီး စက်သုံးဆီ ခိုးသည်တဲ့သူတွေကိုလည်း ဖမ်းဆီးနေတာဖြစ်ပါတယ်။
အလားတူ ပြီးခဲ့တဲ့ ဖေဖော်ဝါရီ ၉ ရက်ကလည်း မြဝတီဘက်ကို မိုဘိုင်းဖုန်း၊ ဘက္ထရီ၊ အင်ဗာတာ၊ မီးစက်၊ ဆိုလာပြား၊ လျှပ်စစ်ဝါယာကြိုး၊ လျှပ်စစ်သုံးမော်တာ၊အင်ဂျင်ဝိုင်၊ Controller နဲ့ အွန်လိုင်းငွေလိမ်လုပ်ငန်းတွေမှာအသုံးပြုတဲ့ ဆော့ဖ်ဝဲတွေကို ထိုင်းဘက်က တင်သွင်းခွင့် ပိတ်လိုက်ပါတယ်။
ထိုင်းဘက်က စက်သုံးဆီ၊ လျှပ်စစ်မီးနဲ့ လျှပ်စစ်ပစ္စည်း တင်သွင်းခွင့် ပိတ်လိုက်တာဟာ မြဝတီမြို့ထဲမှာ အခြေစိုက်တဲ့ ကျားဖျန့်လုပ်ငန်းတွေကို ပစ်မှတ်ထားပိတ်ထားတာဖြစ်ပေမယ့် မြေပြင်မှာတော့ လူထုတွေသာ ထိခိုက်နစ်နာနေရတာဖြစ်ကြောင်း မြဝတီဒေသခံတွေရဲ့ပြောပြချက်အရ သိရပါတယ်။
