အိုက်ပွီး၊ ဖေဖော်ဝါရီ ၂၄ ရက်၊ ဟားခါး
ချင်းပြည်နယ် ဟားခါးမြို့နယ် Halta ရွာမှာ စစ်ကောင်စီတပ်က လေကြောင်းကနေ ဗုံးကြဲတိုက်ခိုက်လို့ ကလေးနှစ်ဦးအပါအဝင် ၅ ဦး ဒဏ်ရာရပြီး လူနေအိမ် ၄ လုံးထက်မနည်း ထိခိုက်ပျက်စီးသွားတယ်လို့ ဒေသခံတွေဆီက သိရပါတယ်။
Halta ရွာဟာ မြို့တော် ဟားခါးနဲ့ မိုင် ၇၀ လောက်ဝေးပြီး ချင်းတော်လှန်ရေးတပ်ဖွဲ့တွေ ထိန်းချုပ်ထားတဲ့ကျေးရွာ ဖြစ်ပေမဲ့ တပ်စခန်း ချတာ၊ လှုပ်ရှားတာတွေမရှိဘဲ အရပ်သား နေထိုင်တဲ့ကျေးရွာ ဖြစ်ပါတယ်။
စစ်တပ်က တိုက်ပွဲ ဖြစ်ပွားတာမရှိဘဲ အရပ်သားတွေ နေထိုင်တဲ့ Halta ရွာကို မနေ့ ဖေဖော်ဝါရီ ၂၃ ရက် နေ့လယ် ၁ နာရီခန့်မှာ လေကြောင်းကနေ ဗုံးကြဲတိုက်ခိုက်ခဲ့လို့ အရပ်သားတွေ ထိခိုက်ဒဏ်ရာ ရရှိခဲ့ပါတယ်။
“ရွာမှာတော့ ဘာပွဲမှ လုပ်တာတွေ၊ ထူးခြားတာတွေမရှိဘဲ ပုံမှန်ပါပဲ။ မနေ့က စစ်တပ်က ဗုံးကြဲသွားတယ်။ ရွာထဲကလူတွေ အလုပ် သွားကုန်တာကြောင့် ထိခိုက်မှု နည်းသွားတယ်။ ၅ ယောက်လောက် ထိခိုက်ဒဏ်ရာ ရသွားတယ်” လို့ Halta ရွာခံအမျိုးသားတစ်ဦးက ရွှေဖီမြေသို့ ပြောပါတယ်။
ဗုံးကြဲ တိုက်ခိုက်လို့ Pu Dawt Uk နဲ့ ဇနီးဖြစ်သူ၊ ကလေးနှစ်ဦးအပါအဝင် နောက်ထပ်တစ်ဦး ထိခိုက်ဒဏ်ရာ ရရှိခဲ့တယ်လို့ သိရပါတယ်။
ဒါ့အပြင် Pu Dawt Uk နဲ့ Pu Tial Uk တို့ရဲ့ နေအိမ်နှစ်လုံးဟာ ပျက်စီးသွားပြီး နောက်ထပ် နေအိမ် ၂ လုံးလည်း အနည်းငယ် ထိခိုက်ပျက်စီးသွားတယ်လို့ သိရပါတယ်။
