လွေးထွေး၊ ဖေဖော်ဝါရီ ၂၃ ရက်၊ ငဖဲ
မကွေးတိုင်း ငဖဲမြို့နယ်ရှိ စစ်ကောင်စီရဲ့ နတ်ရေကန် လေကြောင်းရန်ကာကွယ်ရေးတပ်ကနေ လက်နက်တွေ သယ်လာတဲ့ စစ်ကောင်စီယာဉ်တန်း ၄ စီးကို ချင်းကာကွယ်ရေးတပ် CDF-Asho က ဖြတ်တောက်တိုက်ခိုက်ခဲ့ရာ စစ်သား ၇ ဦး သေဆုံးပြီး ကား ၂ စီး ပျက်စီးခဲ့ကြောင်း ထုတ်ပြန်လာပါတယ်။
မနေ့ ဖေဖော်ဝါရီ ၂၂ ရက် နေ့လယ် ၁ နာရီခွဲဝန်းကျင်မှာ ကား ၄ စီးပေါ် စစ်ကောင်စီတပ် အင်အား ၁၀၀ ကျော် လိုက်ပါလာတာဖြစ်ပြီး နတ်ရေကန်လမ်းဟောင်းမှာ ကြားဖြတ် တိုက်ခိုက်ခဲ့ကြောင်း CDF-Asho မှ ပြောရေးဆိုခွင့်ရှိသူ ဆလိုင်း ရိုးချင်းက ရွှေဖီမြေကို ပြောပါတယ်။
“လတ်တလောမှာလည်း နေ့တိုင်းမဟုတ်ရင်တောင် စကစရဲ့ လှုပ်ရှားသွားလာမှုတွေကို ဖြတ်တောက် တိုက်ခိုက်မှုကတော့ ဖြစ်နေဆဲပါ။ အခု နတ်ရေကန် လမ်းဟောင်းတစ်ကြောလုံးမှာတော့ စကစတပ်တွေက နေရာတော်တော်များများမှာ တပ်စွဲနေရာယူထားပြီးမှ လုံခြုံရေးအပြည့် ယူထားပြီး ကားတွေနဲ့ နတ်ရေကန်ပေါ် တက်လိုက် ဆင်းလိုက် လုပ်နေပါတယ်”
တိုက်ခိုက်မှုအတွင်း စစ်တပ်ဘက်က သေဆုံးမှုအပြင် ဒဏ်ရာရသူလည်း များသလို CDF ဘက်ကလည်း တစ်ဦးကျဆုံးခဲ့ပြီး တစ်ဦးထိခိုက်ဒဏ်ရာ ရခဲ့တယ်လို့ ဆိုပါတယ်။
ပြီးခဲ့တဲ့ ဖေဖော်ဝါရီ ၉ ရက်ကလည်း ငဖဲမြို့နယ် ပဒါန်းမြို့ အနောက်ဘက်က စစ်ကောင်စီတပ်ရဲ့ စစ်ဆေးရေးဂိတ်အနီးက တပ်စခန်းကို CDF-Asho က ဝင်ရောက်တိုက်ခိုက်ခဲ့ကြောင်း ထုတ်ပြန်ချက်ထဲ ဖော်ပြထားပါတယ်။
