လွေးထွေး၊ ဖေဖော်ဝါရီ ၂၃ ရက်၊ မိုင်းယော်
ရှမ်းမြောက် လားရှိုးခရိုင် မိုင်းယော်တိုက်နယ် လုံမွန်းကျေးရွာက ၁၅ နှစ်အရွယ် အမျိုးသမီးငယ်ကို ကိုးကန့်တပ်- MNDAA က လဝက်ကျော် ကြာတဲ့အထိ ဖမ်းဆီးထားတယ်လို့ မိသားစုဝင်နဲ့ နီးစပ်သူ အမျိုးသားတစ်ဦးက ပြောပါတယ်။
ပြီးခဲ့တဲ့ ဖေဖော်ဝါရီ ၇ ရက်ကတည်းက အသက် ၁၅ နှစ်အရွယ် နန်းယိင်းဟွမ်ဆိုသူ အမျိုးသမီးငယ်ကို MNDAA က ဖမ်းဆီးခေါ်ဆောင်သွားပြီး ဒီနေ့ ဖေဖော်ဝါရီ ၂၃ ရက်အထိ မိုင်းယော်မှာသာ ဖမ်းဆီးချုပ်နှောင်ထားဆဲ ဖြစ်ပါတယ်။
မိသားစုဝင်နဲ့ နီးစပ်သူက “ရွာဘုန်းကြီးကျောင်းမှာ ရှိနေတဲ့ အဲဒီ စစ်သား (ကိုးကန့်တပ်သား)တွေ အချင်းချင်း ပစ်ခတ်မှုဖြစ်လို့ သေတာ။ အဲဒါကို နန်းယိင်းဟွမ်ကြောင့် ဖြစ်တယ်ဆိုပြီး ဖမ်းသွားတာ။ သူ့မိဘတွေက စိတ်ပူနေတာ အသက် မပြည့်သေးတဲ့ ကလေးလည်း ဖြစ်နေလို့လေ။ သူ့ကို အမြန် ပြန်လွှတ်စေချင်ပြီ” လို့ ပြောပါတယ်။
ကျေးရွာဘုန်းကြီးကျောင်းထဲ ရှိနေတဲ့ ကိုးကန့်တပ်သားအချင်းချင်း ပစ်ခတ်မှု ဖြစ်ပွားရာကနေ တစ်ဦး သေဆုံးခဲ့တာဖြစ်ပြီး အဆိုပါ ပစ်ခတ်မှုဟာ နန်းယိင်းဟွမ်ကြောင့်လို့ စွပ်စွဲကာ ဖမ်းဆီးခဲ့တာပဲ ဖြစ်ပါတယ်။
ဖမ်းဆီးခံရသူ အမျိုးသမီးငယ်ကို မိသားစုဝင်က တစ်ပတ်တစ်ကြိမ် တွေ့ခွင့် ရှိပေမဲ့ အထက်အမိန့်အရ လွှတ်ပေးခွင့် မရှိသေးကြောင်းသာ MNDAA က ပြန်လည် ပြောဆိုကြောင်း သူက ဆက်ပြောပါတယ်။
ဖြစ်စဉ်နဲ့ ပတ်သက်ပြီး ကိုးကန့်တပ်ရဲ့ သတင်းနဲ့ပြန်ကြားရေး တာဝန်ခံတွေကို ရွှေဖီမြေက ဆက်သွယ်ဖို့ ကြိုးစားခဲ့ပေမဲ့ ဆက်သွယ်လို့ မရသေးပါဘူး။
