ပျားကြီး၊ ဖေဖော်ဝါရီ ၂၂ ရက်၊ မန္တလေး
မန္တလေးတက္ကသိုလ်အနီးက KBZ ဘဏ်ကို တစ်ကိုယ်တော် ဓားပြတိုက်ခဲ့တဲ့ ပျူစောထီးအဖွဲ့ဝင် သိန်းဇော်ဦးကို ဖမ်းဆီးရမိခဲ့တယ်လို့ ရဲတပ်ဖွဲ့နဲ့ နီးစပ်သူတွေက ရွှေဖီမြေကို ပြောပါတယ်။
မနေ့ နေ့လယ်ပိုင်းမှာ မဟာအောင်မြေမြို့နယ်က KBZ ဘဏ်ခွဲ ၃၇ ကို သေနတ်ကိုင်ဆောင်ပြီး တစ်ကိုယ်တော် ဓားပြတိုက်ခဲ့တဲ့ သိန်းဇော်ဦးကို ဒီနေ့ ဖေဖော်ဝါရီ ၂၂ ရက် မနက်ပိုင်းက ပြည်ကြီးတံခွန်မြို့နယ်က နေအိမ်မှာ ဖမ်းဆီးရမိခဲ့တာ ဖြစ်ပါတယ်။
“မြင့်ဖေသား သိန်းဇော်ဦးဆိုတာ ပြည်ခွန်မှာတော့ နာမည်ကြီးပဲ။ စစ်မှုထမ်းဖို့ လူစုပေးနေတဲ့သူ။ မဟုတ်တာအားလုံး လုပ်တယ်။ ဘီယာဆိုင် ထိုင်ရင်တောင် လက်ထိပ်ကို စားပွဲပေါ်တင်ပြီး ထိုင်တတ်တယ်။ သူ့အိတ်ထဲမှာ သေနတ်တစ်လက် အမြဲတမ်း ပါတယ်။ အခုတော့ သူတို့ပျူတွေအချင်းချင်း အဝေမတည့်လို့ ပြန်တိုင်လိုက်ပုံရတယ်။ သူ့အိမ်မှာပဲ ဖမ်းခံလိုက်ရတာ” လို့ ပြည်ကြီးတံခွန်မြို့နယ်က ရဲတပ်ဖွဲ့နဲ့ နီးစပ်သူတစ်ဦးက ပြောပါတယ်။
ဓားပြတိုက်မှု ကျူးလွန်ခဲ့သူ သိန်းဇော်ဦးကို ပြည်ကြီးတံခွန်မြို့နယ် လမ်း ၁၂၀ ၆၈ B လမ်းနဲ့ ၆၈ C လမ်းကြားက နေအိမ်မှာ ဖမ်းဆီးရမိခဲ့တာဖြစ်ပြီး ဓားပြတိုက်ခဲ့တဲ့ ငွေ သိန်းပေါင်း (၁,၁၀၀)ကျော်နဲ့ ကိုင်ဆောင်ခဲ့တဲ့ သေနတ်ကိုလည်း သိမ်းဆည်းရမိခဲ့တယ်လို့ သိရပါတယ်။
သိန်းဇော်ဦးဟာ ပြီးခဲ့တဲ့ ဖေဖော်ဝါရီ ၁၈ ရက်ကလည်း လမ်း ၁၂၀၊ ၅၇ လမ်းနဲ့ ၅၈ လမ်းကြားက ကိုဟန်တင် ဆေးဆိုင်ကိုလည်း သေနတ်ပြ ခြိမ်းခြောက်ပြီး ငွေ ၁၅ သိန်း လုယက်ခဲ့သေးတယ်လို့ ရဲနဲ့နီးစပ်သူတွေက ပြောဆိုထားပါတယ်။
