မိုင်းရူပ၊ ဖေဖော်ဝါရီ ၂၂ ရက်၊ ဖယ်ခုံ
ရှမ်းတောင်နဲ့ ကရင်နီနယ်စပ် ဖယ်ခုံမြို့နယ် မိုးဗြဲမြို့မှာ စစ်ရေးအခြေအနေကြောင့် ဖြတ်သန်းသွားလာခွင့် ၅ ရက်ကြာ ပိတ်မယ်လို့ ကရင်နီအမျိုးသားများ ကာကွယ်ရေးတပ်- KNDF ရဲ့ တပ်ရင်း(၃)နဲ့ မိုးဗြဲ PDF က ထုတ်ပြန်ထားပါတယ်။
စစ်တပ်ဟာ လူထုတွေ နေထိုင်တဲ့နေရာကို လက်နက်ကြီး၊ လေကြောင်း တိုက်ခိုက်မှု ပြုလုပ်နေတာကြောင့် လုံခြုံရေးအတွက် ဖေဖော်ဝါရီ ၂၄ ရက်ကနေ ၂၈ ရက်အထိ မိုးဗြဲမြို့အတွင်း ဖြတ်သန်းသွားလာခွင့် ပိတ်ထားမယ်လို့ ဖော်ပြထားပါတယ်။
အရေးကြီးကိစ္စရှိရင် သက်ဆိုင်ရာအဖွဲ့အစည်းနဲ့ ဆက်သွယ်ပြီး ပူးပေါင်းဆောင်ရွက်မှု ပြုလုပ်ဖို့ KNDF ရဲ့ တပ်ရင်း(၃)နဲ့ မိုးဗြဲ PDF က တိုက်တွန်းထားပါတယ်။
မိုးဗြဲမြို့မှာ ဒီရက်ပိုင်းအတွင်း မြေပြင်တိုက်ပွဲ ငြိမ်သက်နေပေမဲ့ စစ်တပ်ဘက်က လက်နက်ကြီးနဲ့ လေကြောင်း တိုက်ခိုက်မှု ပြုလုပ်နေတယ်လို့ မြေပြင်အခြေအနေ သိရှိသူတစ်ဦးက ရွှေဖီမြေကို ပြောပါတယ်။
“စစ်ကောင်စီဘက်က စစ်ကြောင်း ထိုးနေတာတော့ ရှိတယ်။ လေကြောင်း တိုက်ခိုက်မှုတွေလည်း နေ့စဥ်လိုလို ရှိတယ်။ မိုးဗြဲထဲတော့ ဒေသခံတွေ မရှိတော့ဘူး”
မိုးဗြဲမြို့ရဲ့ နေရာအများစုကို ကရင်နီတော်လှန်ရေး အင်အားစုတွေက ထိန်းချုပ်နိုင်ခဲ့ပေမဲ့ မိုးဗြဲမြို့အနီးမှာ စစ်ကောင်စီရဲ့ ခြေမြန်တပ်ရင်း (ခမရ ၄၂၂)ကျန်ရှိနေတာဖြစ်ပါတယ်။
ပြီးခဲ့တဲ့ ဇန်နဝါရီ လဆန်းပိုင်းကစပြီး စစ်တပ်က မိုးဗြဲမြို့ကို ပြန်ရဖို့ အင်အားအလုံးအရင်းနဲ့ ထိုးစစ်ဆင် တိုက်ခိုက်နေပြီး လက်နက်ကြီး၊ ဒရုန်းနဲ့ လေကြောင်းတိုက်ခိုက်မှုလည်း နေ့စဥ်လိုလို ပြုလုပ်နေတယ်လို့ ဆိုပါတယ်။
ပြီးခဲ့တဲ့ ဇန်နဝါရီလအတွင်း မိုးဗြဲမှာ စစ်တပ်နဲ့ ကရင်နီ တော်လှန်ရေးအင်အားစုတွေအကြား ၁ လလုံး တိုက်ပွဲ ဖြစ်ပွားခဲ့ပြီး ကရင်နီပြည်ထဲက ဇန်နဝါရီလ တိုက်ပွဲအတွင်း စစ်ကောင်စီတပ်ဘက်က ၃၀ ကျော်သေဆုံးခဲ့တယ်လို့ KNDF က ထုတ်ပြန်ထားပါတယ်။
စစ်တပ်ဘက်ကတော့ မိုးဗြဲတိုက်ပွဲနဲ့ ပတ်သက်ပြီး တစ်စုံတစ်ရာ သတင်းထုတ်ပြန်ထားတာ မရှိသေးပါဘူး။
