အိုက်ပွီး၊ ဖေဖော်ဝါရီ ၂၁ ရက်၊ ပေါက်တော
အာရက္ခတပ်တော်- AA ထိန်းချုပ်ထားတဲ့ ရခိုင်ပြည်နယ် ပေါက်တောမြို့နယ်မှာ စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့လို့ ကလေးနှစ်ဦးအပါအဝင် ၄ ဦး သေဆုံးခဲ့ပြီး ၂၀ ဦးထက်မနည်း ထိခိုက်ဒဏ်ရာ ရရှိခဲ့တယ်လို့ ဒေသခံတွေဆီက သိရပါတယ်။
တိုက်ပွဲ ဖြစ်ပွားတာမရှိဘဲ ပေါက်တောမြို့နယ်က ရိုဟင်ဂျာရွာနဲ့ ရခိုင်ကျေးရွာ ၁၀ ရွာထက်မနည်းကို မနေ့ ဖေဖော်ဝါရီ ၂၀ ရက် နေ့လယ် ၁ နာရီ ၃၅ မိနစ်ခန့်မှာ Y-12 လေယာဥ်နဲ့ ဗုံးသီး အလုံးရေ ၅၀ ထက်မနည်း ဗုံးကြဲတိုက်ခိုက်ခဲ့တာဖြစ်ပါတယ်။
“မနေ့က လေယာဥ်နဲ့ပတ်ပြီး ဗုံးကြဲသွားတာပါ။ ရွာတွေမှာက ဘာမှထူးခြားတာတွေလည်း မရှိဘူး။ ပုံမှန်အခြေအနေအတိုင်းပါပဲ။ ရွာသားတွေကလည်း သူ့အလုပ်သူ လုပ်နေကြတာပါ။ တချို့တွေဆို အလုပ် လုပ်နေရင်း ဗုံးစတွေ ထိမှန်ကုန်တယ်” လို့ ပေါက်တောမြို့နယ် ဒေသခံအမျိုးသားတစ်ဦးက ပြောပါတယ်။
ဗုံးကြဲတိုက်ခိုက်လို့ သေဆုံးသူတွေဟာ ရခိုင်ရွာဖြစ်တဲ့ ကျောက်တောင်ရွာက ၅ နှစ်အရွယ် ယောကျာ်းလေး ၁ ဦး၊ ၁၂ နှစ်အရွယ် မိန်းကလေးငယ် ၁ ဦး၊ ၂၄ နှစ်အရွယ် အမျိုးသား ၁ ဦးနဲ့ ၅၀ နှစ်အရွယ် အမျိုးသမီး ၁ ဦးတို့ ဖြစ်ပါတယ်။
ဒါ့အပြင် ထိခိုက်ဒဏ်ရာ ရရှိသူတွေထဲလည်း ကလေးငယ် ပါဝင်ပြီး ၎င်းတို့ဟာ လုံခြုံတဲ့နေရာတွေမှာ ဆေးကုသမှု ခံယူနေကြရတယ်လို့ သိရပါတယ်။
အသက်အန္တရာယ် စိုးရိမ်နေရတဲ့ လူနာတွေ ရှိတာကြောင့် သေဆုံးသူ ထပ်တိုးလာနိုင်တယ်လို့လည်း ဆိုပါတယ်။
ဗုံးစ ထိမှန်လို့ အရပ်သားနေအိမ် အများစုလည်း ပျက်စီးသွားခဲ့တယ်လို့ ဆိုပါတယ်။
တစ်ချိန်တည်းမှာပဲ ပေါက်တောမြို့ပေါ် ရပ်ကွက်တချို့မှာလည်း စစ်တပ်က ဗုံးသီး ၁၀ လုံးထက်မနည်း ကြဲချသွားပြီး ဖုန်းဆက်သွယ်လို့ မရတာကြောင့် ထိခိုက်ပျက်စီးမှု ရှိနိုင်ပေမဲ့ အသေးစိတ် မသိရသေးဘူးလို့ ဆိုပါတယ်။
