ခိုင်လေး၊ ဖေဖော်ဝါရီ ၂၀ ရက်၊ တောင်သာ
မန္တလေးတိုင်း တောင်သာမြို့နယ် ထနောင်းကုန်းရွာ ပျူစောထီးစခန်းကို PLA နဲ့ မဟာမိတ် ပူးပေါင်းတပ်ဖွဲ့က ဝင်ရောက်တိုက်ခိုက်ခဲ့ပြီး စစ်သား ၂ ဦး သေဆုံးခဲ့ကာ လက်နက်ခဲယမ်းလည်း သိမ်းဆည်းရမိခဲ့တယ်လို့ PLA အနောက်မြောက်စစ်ဒေသ ရဲ့ ပြောရေးဆိုခွင့်ရှိသူ ရဲဘော် မြင့်နိုင်က ရွှေဖီမြေကို ပြောပါတယ်။
မနေ့ ဖေဖော်ဝါရီ ၁၉ ရက် မနက်ပိုင်းမှာစစ်တပ်နဲ့ ပျူစောထီးရှိတဲ့ ထနောင်းကုန်းရွာ တပ်စခန်းကို PLA ရဲ့ အနောက်မြောက်စစ်ဒေသ အမှတ်(၈၁၅)တပ်ဖွဲ့နဲ့ မဟာမိတ် ပူးပေါင်းတပ်ဖွဲ့က ဝင်ရောက် တိုက်ခိုက်ခဲ့တာလို့ ဆိုပါတယ်။
“အဲစခန်းမှာက ပြည်သူ့စစ်ချည်းပဲ ၄၀ ကျော်လောက် ရှိတယ်ဗျ။ တောင်သာနယ်မှာတော့ ရန်သူရဲ့ အဓိက အင်အားဖြန့် စစ်ကြောင်း ထိုးရင်တော့ အဲပျူရွာကနေ လာတာများတယ်။ ကျနော်တို့ဘက်က စခန်းကို မသိမ်းနိုင်ရင်တောင် ရန်သူကို စစ်ရေးအရ ခြိမ်းခြောက်မှု ပေးနိုင်မှာပေါ့” လို့ ရဲဘော် မြင့်နိုင်က ပြောပါတယ်။
Mi 35 ရဟတ်ယာဉ်နဲ့ နာရီဝက်ကြာ လေကြောင်းပစ်ကူ ပေးခဲ့တာကြောင့် စခန်းတစ်ခုလုံးကို သိမ်းပိုက်နိုင်ခဲ့တာမျိုးမရှိဘဲ ရန်သူရဲ့ လက်နက်ခဲယမ်းတွေကိုသာ သိမ်းဆည်းရမိခဲ့တယ်လို့ ဆိုပါတယ်။
တိုက်ပွဲအတွင်း ကာဘိုင် ၂ လက်၊ KIA ထုတ် KA ၁ လက်၊ ပွိုင့် ၂၂ လက်လုပ်အတို ၂ လက်၊ MG 1 လက်ပစ်ဗုံး ၁ လုံး၊ ကာဘိုင် ကျည်ဘောက်အပို ၄ ခု၊ ကာဘိုင်ကျည် ၁၀၅ တောင့်၊ ပွိုင့် ၂၂ ကျည် ၈ တောင့်၊ စစ်ဦးထုပ် ၂ လုံး၊ ဖုန်း ၃ လုံး အင်ဗာတာအသေး ၁ လုံး၊ ငွေ (၁၅,၂၀၀)ကျပ်၊ သေနတ်ပစ်ပြိုင်ပွဲဝင် ဆုတံဆိပ် ၆ ခု သိမ်းဆည်းရမိခဲ့တယ်လို့ PLA ဘက်က ထုတ်ပြန်ထားပါတယ်။
တိုက်ခိုက်မှုကို ပြည်သူ့လွတ်မြောက်ရေးတပ်မတော်- PLA (အနောက်မြောက်စစ်ဒေသ) အမှတ် ၈၁၅ တပ်ဖွဲ့၊ အထူးတပ်ဖွဲ့၊ ရဲခေါင်ပြောက်ကျားတပ်ဖွဲ့က ထုတ်နှုတ်အင်အားနဲ့ နပတ(၇၀၄) တပ်ပေါင်းစုတပ်ရင်းက ထုတ်နှုတ်အင်အား ပူးပေါင်းပြီး ဖော်ဆောင်ခဲ့တာလို့ ဆိုပါတယ်။
