ခိုင်လေး၊ ဖေဖော်ဝါရီ ၁၉ ရက်၊ ဖွင့်ဖြူ
မကွေးတိုင်း မင်းဘူးခရိုင် ပွင့်ဖြူမြို့က မင်းဘူးခရိုင် အမှတ်(၆)တပ်ရင်း သိမ်းပိုက်ထားတဲ့ မဲဇလီစခန်းကို စစ်ကောင်စီတပ်က ပြန်လည် သိမ်းပိုက်ပြီး မဲဇလီရွာက ဒေသခံတွေရဲ့ နေအိမ်ကိုလည်း မီးရှို့ဖျက်ဆီးသွားခဲ့တယ်လို့ မဲဇလီ ဒေသခံတစ်ဦးက ရွှေဖီမြေကို ပြောပါတယ်။
မဲဇလီစခန်းကို ဒီနေ့မနက်အစောပိုင်းမှာ စစ်တပ်က ပြန်သိမ်းပြီးနောက် ရွာထဲ စစ်ကြောင်း ထိုးလာပြီး ဒေသခံတွေရဲ့ နေအိမ် ၄၅ လုံးကို ဒီနေ့မနက် ၁၀ နာရီခွဲဝန်းကျင်မှာ မီးရှို့ခဲ့ရာ လက်ရှိအချိန်ထိ မီးလောင်နေဆဲ ဖြစ်တယ်လို့ ဆိုပါတယ်။
မဲဇလီ ဒေသခံတစ်ဦးက “ဒီမနက် PDF တွေ သိမ်းထားတဲ့ မဲဇလီစခန်းကို စစ်တပ်က ပြန်လည် စစ်ကြောင်း ထိုးလာတယ်။ ရွာထဲကိုဝင်ပြီး မီးရှို့သွားတာပါ။ ရွာလုံးကျွတ်ထွက်ပြေးနေရတယ်။ လူဦးရေ ၁ ထောင်လောက် ရှိမယ်။ အခုတော့ မင်းဘူးခရိုင်တပ်ရင်းတွေပါ ပြန်ဆုတ်သွားပြီ” လို့ ပြောပါတယ်။
ပွင့်ဖြူမြို့နဲ့ မိုင် ၂၀ ကွာဝေးတဲ့ မဲဇလီစခန်းကို ပြီးခဲ့တဲ့ ဇန်နဝါရီ ၃၁ ရက်က မင်းဘူးခရိုင် အမှတ်(၆)တပ်ရင်းနဲ့ မဟာမိတ် ပူးပေါင်းတပ်ဖွဲ့က သိမ်းပိုက်ရရှိခဲ့တာ ဖြစ်ပါတယ်။
ပြီးခဲ့တဲ့ ဖေဖော်ဝါရီ ၁ ရက်ကလည်း မဲဇလီစခန်းဘက် စစ်ကူလာတဲ့ စစ်တပ်ကို မဒဲကုန်းရွာအနီးမှာ မဟာမိတ် ပူးပေါင်းတပ်ဖွဲ့က ကြားဖြတ်တိုက်ခိုက်ခဲ့ရာ မဲဇလီရွာ ဝန်းကျင်ကို ဗုံးကြဲတိုက်ခိုက်ခဲ့ကာ မဒဲကုန်းရွာကိုလည်း မီးရှို့ခဲ့ပါတယ်။
ပွင့်ဖြူမြို့နယ်အတွင်းမှာရှိတဲ့ ကျေးရွာတွေမှာ စစ်တပ်က လက်နက်ကြီးနဲ့ ရမ်းသမ်းပစ်ခတ်တာ၊ လေယာဉ်နဲ့ ဗုံးကြဲတာတွေပြုလုပ်နေတာကြောင့် ဒေသခံ ၁ သောင်းကျော် ထွက်ပြေးတိမ်းရှောင်နေရတယ်လို့ ဆိုပါတယ်။
