အင်းလေး၊ ဖေဖော်ဝါရီ ၁၉ ရက်၊ ညောင်ရွှေ
ရှမ်းတောင် ညောင်ရွှေမြို့နယ် အင်းလေးဒေသမှာ စစ်ကောင်စီတပ်၊ ပအိုဝ်းပြည်သူ့စစ်- PNA ပူးပေါင်းတပ်ရဲ့ လက်နက်ကြီး ပစ်ခတ်မှုကြောင့် စစ်ရှောင် ၃ ထောင်ကျော်အထိ ရှိလာပြီလို့ ဒေသတွင်း ကူညီဆောင်ရွက်ပေးနေတဲ့ အဖွဲ့အစည်းတွေက ပြောပါတယ်။
အဲဒီ စစ်ဘေးရှောင်တွေဟာ ဇန်နဝါရီလ နောက်ဆုံးအပတ်က စစ်တပ်ရဲ့ ထိုးစစ်ဆင်မှုကြောင့် တိမ်းရှောင်လာသူဖြစ်ပြီး ဖေဖော်ဝါရီလ ဒုတိယပတ်အတွင်း နောက်ထပ် တိုးလာတဲ့ လူဦးရေလည်း ပါဝင်တယ်လို့ ဆိုပါတယ်။
စစ်ဘေးရှောင်အရေး ကူညီပေးနေတဲ့ တက်ကြွလှုပ်ရှားသူတစ်ဦးက “လူကတော့ မကျန်သလောက်ပဲ။ ရှေ့ပတ်က တော်တော် ထွက်သွားကြတာ။ တော်တော်များများက တောထဲ ရှောင်ကြတယ်။ ကုန်းလမ်းကတော့ စစ်တပ်ဖက်က ပိတ်ထားတယ်။ ရေလမ်းကနေ အင်းထဲ ရှောင်ကြတာလည်း ရှိတယ်” လို့ ပြောပါတယ်။
လက်ရှိမှာ အင်းလေးတောင်ပိုင်းရှိ စံကား၊ ရေပူ၊ ဘုရားတောင်၊ ညောင်လေးပင်ကျေးရွာခံတွေဟာ တိမ်းရှောင်နေကြရပြီး ပင်လောင်းနဲ့ ဖယ်ခုံမြို့နယ်အစပ်က ကျေးရွာတချို့လည်း ပါဝင်တယ်လို့ သိရပါတယ်။
ဒါ့အပြင် ရွာလုံးကျွတ် စစ်ဘေးရှောင်နေရတဲ့ ကျေးရွာတွေမှာ စစ်တပ်က ဝင်ရောက် တပ်စွဲတာ၊ ရိက္ခာ စုဆောင်းတာတွေ ပြုလုပ်နေတာကြောင့် တိုက်ပွဲ ငြိမ်သွားတဲ့အချိန် ရောက်ခဲ့ရင်လည်း နေရပ်ပြန်ဖို့ စိုးရိမ်ပူပန်နေရတယ်လို့ ဆိုပါတယ်။
ထွက်ပြေးတိမ်းရှောင်လာသူ အမျိုးသမီး တစ်ဦးက “PNO တွေ အကျအဆုံး များလို့ စစ်ကူ တော်တော် ဖြည့်ထားတယ်။ အခုစစ်ကြောင်း ထိုးတာတွေက PNO အားကိုးနဲ့ လုပ်နေတာ။ စစ်တပ်ဖက်က လူမျိုးရေး မှိုင်းတိုက်တာပေါ့။ နင်တို့ အင်းသားတွေကို ပအိုဝ်းတွေ ပစ်နေကြပြီဆိုတာမျိုး ဝါဒဖြန့်တာပါ။ PNO ရှိသရွေ့ အင်းလေးဒေသက ပြည်သူတွေ အိပ်ကောင်းခြင်း မအိပ်ရပါဘူး” လို့ ပြောပါတယ်။
လက်ရှိ မြေပြင်အခြေအနေအရ ပင်လောင်း၊ ဖယ်ခုံ၊ ညောင်ရွှေ စတဲ့မြို့နယ် ၃ ခုရဲ့ အနီးတစ်ဝိုက်နေရာမှာ တိုက်ပွဲပြင်းထန်နေဆဲဖြစ်ပြီး စံကားအင်းနဲ့ ဖယ်ခုံအင်း အနောက်ဘက်ခြမ်းမှာ တပ်စွဲထားတဲ့ စစ်တပ်က တစ်ရက်ကို လက်နက်ကြီး ၁၅ ကြိမ်ထက်မနည်း အင်းလေးဒေသတွင်း ဦးတည်ပစ်ခတ်နေတာကြောင့် နေရပ်သို့ ပြန်မလာကြသေးဖို့ မြေပြင်အရင်းအမြစ်တွေက သတိပေးထားပါတယ်။
၂၀၂၅ ခုနှစ် နှစ်ဦးပိုင်းအတွင်း အင်းလေးဒေသနဲ့ ပင်လောင်းမြို့နယ်အစပ် ကျေးရွာတွေမှာ စစ်တပ်ရဲ့ လက်နက်ကြီး ပစ်ခတ်မှုကြောင့် ၂၃ နှစ်အောက်ကလေးအပါအဝင် စစ်ဘေးရှောင်နဲ့ ဒေသခံ စုစုပေါင်း ၇ ဦး သေဆုံးခဲ့ပြီး ၂၄ ဦး ပြင်းထန်ဒဏ်ရာ ရရှိခဲ့တယ်လို့ အင်းလေးဒေသ လူ့အခွင့်အရေးအဖွဲ့က ထုတ်ပြန်ပါတယ်။
ဒါ့အပြင် စာသင်ကျောင်းနဲ့ ဆေးပေးခန်း အပါအဝင် လူနေအိမ် ၃၀ နီးပါးလည်း မီးလောင်ပြာကျ ပျက်စီးခဲ့ပြီး ကျွဲ၊ နွား၊ ဝက်၊ ကြက် စတဲ့အိမ်မွေးတိရစ္ဆာန်လည်း ထိခိုက်သေဆုံးမှု ရှိတယ်လို့ သိရပါတယ်။
