ရွှေဖီမြေ၊ ဖေဖော်ဝါရီ ၁၉ ရက်
ပြီးခဲ့တဲ့ ဖေဖော်ဝါရီ ၁၆ ရက်နဲ့ ၁၇ ရက်က တရုတ်မှာ နှစ်ရက်တာ တွေ့ဆုံဆွေးခဲ့ကြတဲ့ စစ်ကောင်စီနဲ့ တအာင်းတပ်ရဲ့ ဆွေးနွေးပွဲ ပြီးဆုံးခဲ့ပြီး အဲဒီဆွေးနွေးပွဲမှာ အချက် ၃ ချက်ကို အဓိထား ဆွေးနွေးခဲ့တယ်လို့ တအာင်းတပ်ဘက်က ထုတ်ပြန်ပါတယ်။
ဆွေးနွေးခဲ့တဲ့ အချက် ၃ ချက်ကတော့ နှစ်ဖက်တပ် ရောက်ရှိတဲ့နေရာမှာ ရပ်တန့်ထားပြီး အပစ်အခတ် ရပ်စဲရန်၊ နှစ်ဖက်စလုံး ထိုးစစ် ပြုလုပ်ခြင်း၊ ဒရုန်းနဲ့ တိုက်ခိုက်ခြင်း၊ လက်နက်ကြီး ပစ်ခတ်ခြင်း၊ လေယာဉ်ဗုံးကြဲချခြင်း စတဲ့စစ်ရေးလှုပ်ရှားမှုအားလုံး ရပ်တန့်ရန်၊ နှစ်ဖက် ထိန်းချုပ်နယ်မြေဒေသတွေမှာ ဒေသခံလူထုတွေအနေနဲ့ စားသောက်ကုန်နဲ့ ဆေးဝါးတွေ သယ်ဆောင်နိုင်ဖို့အတွက် ဖြတ်သန်းသွားလာခွင့်ပြုဖို့ ဖြစ်တယ်လို့ ဆိုပါတယ်။
ဆွေးနွေးပွဲမှာ နှစ်ဖက်တောင်းဆိုမှု အပြန်အလှန် ပြုလုပ်ခဲ့ကြပြီး ဆက်လက်ဆွေးနွေးဖို့ ခက်ခဲလာတဲ့အတွက် ၁၇ ရက်နေ့ ညနေပိုင်းမှာ ဆွေးနွေးပွဲ ပြီးဆုံးသွားခဲ့တယ်လို့ ဆိုပါတယ်။
နှစ်ဖက်တပ်ဘက်က ဆွေးနွေးပြင်ဆင်မှု ပြုလုပ်ပြီးမှသာ နောက်တစ်ကြိမ် ပြန်လည်တွေ့ဆုံနိုင်ဖို့အတွက် တရုတ်အစိုးရ အထူးကိုယ်စားလှယ် မစ္စတာ တိန့်ရှီကျွင်းက ပြောဆိုကာ တွေ့ဆုံမှုကို အဆုံးသတ်ခဲ့တယ်လို့ ပြောဆိုထားပါတယ်။
