ခိုင်လေး၊ ဖေဖော်ဝါရီ ၁၉ ရက်၊ မုံရွာ
စစ်ကိုင်းတိုင်း မုံရွာ-ချောင်းဦး လမ်းပိုင်းတစ်နေရာမှာ မုံရွာအခြေစိုက် စစ်ကောင်စီရဲ့ အနောက်မြောက်တိုင်း စစ်ဌာနချုပ် (နမခ)ကနေ ထွက်လာတဲ့ ယာဥ်တန်းကို ပြောက်ကျားတပ်ဖွဲ့- Royal Tiger Force နဲ့ ပူးပေါင်းမဟာမိတ်တပ်ဖွဲ့က ပဒေသာမိုင်း ၁၅ လုံးနဲ့ ဖောက်ခွဲတိုက်ခိုက်ခဲ့ရာ ၂ ဦး သေဆုံးပြီး ၂ ဦး ဒဏ်ရာ ရခဲ့တယ်လို့ မနေ့ ဖေဖော်ဝါရီ ၁၈ ရက်မှာ ထုတ်ပြန်ထားပါတယ်။
ဖေဖော်ဝါရီ ၁၇ ရက် ညနေ ၄ နာရီကျော်မှာ စစ်ကိုင်းမြို့ဘက်သွားဖို့ မုံရွာမြို့ နမခကနေ ထွက်လာတဲ့ စစ်ကောင်စီရဲ့ သံပြားကာ ကား ၇ စီးကို ပဒေသာမိုင်း ၁၅ လုံးနဲ့ ဖောက်ခွဲဖို့ ပွိုင့်သုံးပွိုင့်ခွဲပြီး တိုက်ခိုက်ခဲ့တာလို့ Royal Tiger Force မှ ပြောခွင့်ရသူ ကို Zero က ရွှေဖီမြေကို ပြောပါတယ်။
“တတိယမြောက် ကားက ပွိုင့်တည့်တည့်ကျပြီး ပျက်စီးသွားတယ်။ သူတို့ အဲကားကို နတ်ရေကန် ဂိတ်မှာဘဲ ထားခဲ့တယ်။ သေတဲ့နှစ်ယောက်နဲ့ ဒဏ်ရာရတဲ့သူတွေကို စစ်ကိုင်းဘက် ခေါ်သွားတယ်လို့ သိရတယ်”
မုံရွာ-ချောင်းဦးလမ်းပိုင်းမှာ အခုလို တိုက်ခိုက်မှု မကြာခဏ ဖြစ်ပွားလေ့ ရှိတာကြောင့် ဒေသခံတွေအနေနဲ့ ခရီးသွားတာတွေ မပြုလုပ်ဖို့၊ သွားလာမယ်ဆိုရင်လည်း စစ်ကောင်စီရဲ့ ယာဉ်တန်းနဲ့ ခပ်ဝေးဝေးမှာသာ သွားလာကြဖို့ ကို Zero က ဆက်ပြောပါတယ်။
အဲဒီတိုက်ခိုက်မှုကို ပြောက်ကျားတပ်ဖွဲ့- Royal Tiger Foce၊ မုံရွာခရိုင် အမှတ်(၁၂) တပ်ရင်း၊ တပ်ခွဲ(၃) လျှပ်စီးတပ်ခွဲ၊ မုံရွာခရိုင် အမှတ်(၁၅)တပ်ရင်း တပ်ခွဲ(၃)၊ နွေဦးညီအစ်ကိုများစစ်ကြောင်းက ပူးပေါင်းလုပ်ဆောင်ခဲ့တာ ဖြစ်ပါတယ်။
ပြီးခဲ့တဲ့ ဖေဖော်ဝါရီ ၃ ရက်ကလည်း မုံရွာမြို့ နမခမှ ထွက်ခွာလာတဲ့ စစ်တပ်ရဲ့ သံပြားကာ ကား ၃ စီးကို မိုင်းဆွဲတိုက်ခိုက်ရာ ချောင်းဦး-မြင်းမူ ကားလမ်းမကြီးအတိုင်း စစ်ကြောင်း ထိုးလာတဲ့ စစ်သား ၃၀ ခန့်ပါတဲ့ စစ်ကြောင်းကိုလည်း ဒရုန်းနဲ့ လိုက်လံ တိုက်ခိုက်ခဲ့ရာ စစ်သား ၉ ဦး သေဆုံးပြီး ၅ ဦး ဒဏ်ရာ ရခဲ့ပါတယ်။
