လွေးထွေး၊ ဖေဖော်ဝါရီ ၁၉ ရက်၊ တန့်ယန်း
စစ်ကောင်စီတပ် ထိန်းချုပ်ထားတဲ့ တန့်ယန်းမြို့နယ်ထဲက ကျေးရွာအုပ်စုတချို့မှ အမျိုးသားအများစုဟာ မူးယစ်ဆေး သုံးစွဲနေကြပြီး ရှမ်းတပ်မတော်- SSPP/SSA ကို တိုင်ကြားရင် လာရောက် ဖမ်းဆီးတာ ရှိပေမဲ့ ငွေပေးရင် ပြန်လွှတ်ပေးနေတယ်လို့ ဖြစ်စဥ္သိရှိသူ အမျိုးသားတစ်ဦးက ပြောပါတယ်။
တန့်ယန်းမြို့နယ် ကလန့်ကဒေါ၊ မန်မက်၊ နမ့်ခမ်း၊ နာစောက်နဲ့ နာစေရွာ စတဲ့ကျေးရွာက ဒေသခံတွေ မူးယစ်ဆေး သုံးစွဲလာကြတာပဲ ဖြစ်ပါတယ်။
“ဒီနှစ်ထဲမှာ သူတို့က ပိုအသုံးများလာတယ်။ ဒီအနီးအနားမှာဆို ရှမ်းစစ်သား ရှိတယ်။ သူတို့ကို သွားတိုင်တယ်။ ဖမ်းပေးတယ်။ နောက်တစ်ရက် နှစ်ရက်ဆို သူတို့တောင်းသလောက် ပိုက်ဆံ ၅ သိန်းလား ၁၀ သိန်းလား ပေးရင် အကုန်ပြန်လွှတ်တာဘဲ။ ဘာမှ အကျင့်စရိုက် ပြုပြင်ပေးတာ မရှိဘူး။ အဲဒါကြောင့် ဒီကလူတွေဟာ ဆင်းရဲသည်ထက် ဆင်းရဲနေတာ” လို့ ဒေသခံ အမျိုးသားတစ်ဦးက ပြောပါတယ်။
SSPP/SSA ဟာ အမျိုးအစားအလိုက် မူးယစ်ဆေးဝါး သုံးစွဲသူကို ဖမ်းဆီးငွေတောင်းနေပေမဲ့ မူးယစ်ဆေးဝါး ရောင်းဝယ်သူတွေကိုတော့ ဖမ်းဆီးအရေးယူတာ မရှိဘူးလို့လည်း သူက ဆက်ပြောပါတယ်။
ကျေးရွာတစ်ရွာမှာ အိမ်ခြေ ၃၀ ကျော်ရှိရင် ၂၀ ကျော်လောက်က မူးယစ်ဆေး သုံးစွဲကြပြီး သုံးစွဲသူတွေထဲ အမျိုးသားက ပိုပြီး သုံးစွဲကြတယ်လို့ သိရပါတယ်။
မူးယစ်ဆေးဝါး သုံးစွဲမှု နောက်ဆက်တွဲအနေနဲ့ အိမ်တွင်းအကြမ်းဖက်မှုပြသာနာ မကြာခဏ ဖြစ်ပွားပြီး မူးယစ်ဆေးဝါး သုံးစွဲသူအပြင် ရောင်းဝယ်သူတွေကိုပါ ထိထိရောက်ရောက် အရေးယူပေးစေချင်ကြောင်း ဒေသခံတွေက ပြောဆိုပါတယ်။
လက်ရှိ ဖြစ်ပွားနေတဲ့ ဖြစ်စဉ်နဲ့ ပတ်သက်ပြီး အသေးစိတ် သိရဖို့ SSPP ရဲ့ ပြောရေးဆိုခွင့်ရှိသူ ဗိုလ်မှူး စိုင်းဖုန်းဟန်ကို စာပို့တာအပြင် ဖုန်းနဲ့ ဆက်သွယ်ပေမဲ့ ဆက်သွယ်လို့ မရပါဘူး။
