အိုက်ပွီး၊ ဖေဖော်ဝါရီ ၁၈ ရက်၊ စစ်တွေ
ရခိုင်ပြည်နယ်ရဲ့မြို့တော် စစ်တွေမြို့နယ်မှာ စစ်ကောင်စီတပ်နဲ့ အာရက္ခတပ်တော်- AA တို့ အပြန်အလှန် လက်နက်ကြီး ပစ်ခတ်မှု ဖြစ်ပွားပြီး စစ်ကောင်စီတပ်က လေကြောင်းကနေ ဗုံးကြဲတိုက်ခိုက်နေတယ်လို့ ရခိုင်စစ်ရေးအခြေအနေသိရှိသူ ဒေသခံအမျိုးသားတစ်ဦးက ရွှေဖီမြေသို့ ပြောပါတယ်။
စစ်တွေမြို့အခြေစိုက် စစ်တပ်ရဲ့ တပ်ရင်း၊ ရဲစခန်း၊ ရေတပ်နဲ့ စစ်ရေယာဥ်ရှိတဲ့နေရာကို AA က ပြီးခဲ့တဲ့ ဇန်နဝါရီလကတည်းက လက်နက်ကြီးကျည်နဲ့ ပစ်ခတ်တိုက်ခိုက်ခဲ့ပြီး မနေ့ ဖေဖော်ဝါရီ ၁၇ ရက် ညနေ ၆ နာရီကလည်း လက်နက်ကြီးကျည်နဲ့ တိုက်ခိုက်ခဲ့ရာ စစ်ကောင်စီတပ်ကလည်း လက်နက်ကြီးနဲ့ လေကြောင်းနဲ့ပါ တိုက်ခိုက်ခဲ့တယ်လို့ သိရပါတယ်။
“မနေ့က ည ၆ နာရီလောက်ကစပြီး AA က စစ်တွေမြို့မှာရှိတဲ့ တပ်ရင်း၊ တပ်စခန်းတွေကို လက်နက်ကြီးတွေနဲ့ ပစ်ခတ်တိုက်ခိုက်ခဲ့တာပါ။ စစ်ကောင်စီတပ်ကလည်း AA တွေရှိတဲ့နေရာတွေကို လက်နက်ကြီးကျည်တွေ အတွဲလိုက် ဒုံးကျည်တွေ ပစ်ခတ်နေပါတယ်။ ည ၉ နာရီလောက်မှာ စစ်တွေ၊ ပေါက်တော၊ ပုဏ္ဏကျွန်း စတဲ့မြို့နယ်တွေမှာ လေကြောင်း ဗုံးကြဲတိုက်ခိုက်ခဲ့တယ်” လို့ ရခိုင်စစ်ရေးအခြေအနေသိရှိသူ ဒေသခံအမျိုးသားတစ်ဦးက ရွှေဖီမြေသို့ ပြောပါတယ်။
စစ်တွေမြို့နယ်မှာ စစ်တပ်နဲ့ AA တို့ မကြာခဏ လက်နက်ကြီး အပြန်အလှန် ပစ်ခတ်မှုကြောင့် ပြီးခဲ့တဲ့ ဇန်နဝါရီလကတည်းက ကျေးရွာခံတွေဟာ ဘေးလွတ်ရာ ထွက်ပြေးတိမ်းရှောင်နေကြရတယ်လို့ သိရပါတယ်။
ရခိုင်ပြည်နယ်မှာ ဖြစ်ပွားတဲ့ တိုက်ပွဲအတွင်း AA က ဖမ်းဆီးထားတဲ့ စစ်သုံ့ပန်းနဲ့ မိသားစုဝင်၊ အကြောင်းအမျိုးမျိုးကြောင့် ဖမ်းဆီးထိန်းသိမ်းထားသူ စုစုပေါင်း၂၀၀ ခန့်ကို ပြန်လွှတ်ပေးလိုက်တယ်လို့ AA နဲ့ နီးစပ်သူတစ်ဦးက ရွှေဖီမြေသို့ ပြောပါတယ်။
“ကျန်းမာရေး မကောင်းတဲ့သူတွေ၊ အပြစ်မရှိတဲ့သူတွေ ပါတယ်။ ပြီးတော့ စစ်ကောင်စီတပ် ထိန်းချုပ်မှုမှာမရှိတဲ့ မြို့နယ်တွေ၊ ကျေးရွာတွေကဖြစ်တယ်။ အများအားဖြင့်တော့ ရခိုင်ပြည်နယ်တွင်းက ဒေသခံတွေဖြစ်ပါတယ်”
ပြန်လွှတ်ပေးသူတွေထဲ ဒုရဲမှူးကြီးအပါအဝင် အမျိုးသား ၅၁ ဦးနဲ့ အမျိုးသမီး ၁၄၇ ဦး ပါဝင်တယ်လို့ သိရပါတယ်။
ပြီးခဲ့တဲ့ ဖေဖော်ဝါရီလ ပထမပတ်အတွင်းကလည်း AA ဖမ်းဆီးထားတဲ့ စစ်သုံ့ပန်း အမျိုးသား ၄၀ ဦး၊ အမျိုးသမီး ၇၆ ဦးနဲ့ အရပ်သား အကျဥ်းသား ၂၆ ဦး စုစုပေါင်း ၁၄၂ ဦးကို AA က ပြန်လွှတ်ပေးခဲ့တယ်လို့ သိရပါတယ်။
