မိုင်းရူပ၊ ဖေဖော်ဝါရီ ၁၈ ရက်၊ ဖယ်ခုံ
ရှမ်းတောင်နဲ့ ကရင်နီနယ်စပ် ဖယ်ခုံမြို့နယ် မိုးဗြဲမြို့မှာ စစ်ကောင်စီတပ်နဲ့ ကရင်နီ တော်လှန်ရေးအင်အားစုတို့ တိုက်ပွဲ ဆက်လက် ပြင်းထန်နေပြီး စစ်ကောင်စီတပ်ဖွဲ့ဝင် ၁၃ ဦး KNDF ထံ ဘက်ပြောင်းခိုလှုံလာတယ်လို့ KNDF ရဲ့ ဗဟိုနဲ့ သတင်းပြန်ကြားရေး တာဝန်ခံက ရွှေဖီမြေကို ပြောပါတယ်။
ဖေဖော်ဝါရီလအတွင်း စစ်တပ်ဘက်က လက်နက်နဲ့အတူ အလင်းဝင်လာသူ ၅ ဦး၊ လက်နက်မဲ့နဲ့ အလင်းဝင်လာသူ ၈ ဦးရှိပြီး မိုးဗြဲမြို့မှာ နေ့စဥ်လိုလို ထိတွေ့တိုက်ပွဲ ဆက်ဖြစ်နေတာကြောင့် ဘက်ပြောင်းခိုလှုံလာတဲ့ စစ်ကောင်စီတပ်ဖွဲ့ဝင် ပိုများလာတာလို့ ဆိုပါတယ်။
“မိုးဗြဲမှာ ထိတွေ့တိုက်ပွဲ နေ့တိုင်း ဖြစ်နေပါတယ်။ အခု အလင်းဝင်လာတဲ့သူတွေက မိုးဗြဲကနေ ထွက်ပြေးလာတဲ့ စစ်ကောင်စီတပ်ဖွဲ့ဝင်တွေ ဖြစ်တယ်” လို့ KNDF ရဲ့ ဗဟိုနဲ့ သတင်းပြန်ကြားရေး တာဝန်ခံက ရွှေဖီမြေကို ပြောပါတယ်။
စစ်တပ်ဟာ ရှေ့တန်း စစ်မြေပြင်မှာ ၎င်းတို့ အတင်းအဓမ္မ တပ်သားသစ် စုဆောင်းထားသူတွေကို အသုံးပြုနေတာ တွေ့ရပြီး စစ်ကောင်စီတပ်ရဲ့ အတင်းအဓမ္မ တပ်သားသစ်အဖြစ် စုဆောင်းခံရသူတွေအနေနဲ့ ဘက်ပြောင်းခိုလှုံကြဖို့ကိုလည်း KNDF က တိုက်တွန်းထားပါတယ်။
ပြီးခဲ့တဲ့ ဇန်နဝါရီလကစပြီး ကရင်နီတော်လှန်ရေး အင်အားစုတွေ ထိန်းချုပ်ထားတဲ့ မိုးဗြဲမြို့ကို စစ်တပ်က ပြန်လည် ထိန်းချုပ်ဖို့ ထိုးစစ်ဆင် တိုက်ခိုက်နေတာကြောင့် တိုက်ပွဲ ပြင်းထန်နေတာ ဖြစ်ပါတယ်။
မိုးဗြဲမြို့ရဲ့ နေရာအများစုကို ကရင်နီ တော်လှန်ရေး အင်အားစုတွေက ထိန်းချုပ်နိုင်ခဲ့ပေမဲ့ မိုးဗြဲမြို့အနီးမှာ စစ်ကောင်စီရဲ့ ခြေမြန်တပ်ရင်း (ခမရ ၄၂၂)တော့ ကျန်ရှိနေဆဲ ဖြစ်ပါတယ်။
ပြီးခဲ့တဲ့ ဇန်နဝါရီလအတွင်း မိုးဗြဲမှာ စစ်တပ်နဲ့ ကရင်နီ တော်လှန်ရေး အင်အားစုတွေအကြား ၁ လလုံး တိုက်ပွဲ ဖြစ်ပွားခဲ့ပြီး ဇန်နဝါရီလထဲ တိုက်ပွဲအတွင်း စစ်ကောင်စီတပ်ဘက်က ၃၀ ကျော် သေဆုံးခဲ့တယ်လို့ KNDF က ထုတ်ပြန်ထားပါတယ်။
စစ်တပ်ဘက်ကတော့ မိုးဗြဲတိုက်ပွဲနဲ့ ပတ်သက်ပြီး တစ်စုံတစ်ရာ သတင်းထုတ်ပြန်ထားတာ မရှိသေးပါဘူး။
