ရွှေဖီမြေ၊ ဖေဖော်ဝါရီ ၁၇ ရက်၊ မြဝတီ
ထိုင်း-မြန်မာနယ်စပ်ရှိ မြဝတီ၊ ရွှေကုက္ကိုလ်နဲ့ KK Park စတဲ့နေရာက အွန်လိုင်း ငွေလိမ်ဂိုဏ်းမှာ လုပ်ကိုင်နေသူ (၁,၀၃၀)ဦးကို ဖမ်းဆီးနိုင်ခဲ့တယ်လို့ စစ်ကောင်စီက ဒီနေ့ ဖေဖော်ဝါရီ ၁၇ ရက်မှာ သတင်းထုတ်ပြန်လာပါတယ်။
ပြီးခဲ့တဲ့ ဇန်နဝါရီ ၃၀ ရက်ကနေ ဖေဖော်ဝါရီ ၁၆ ရက်အထိ နှစ်ပတ်ကျော်အတွင်း အွန်လိုင်း ငွေလိမ်ဂိုဏ်းမှာ လုပ်ကိုင်နေသူ (၁,၀၃၀)ဦးကို ဖမ်းဆီးနိုင်ခဲ့ပြီး သက်ဆိုင်ရာနိုင်ငံတွေကို လွှဲပြောင်းနိုင်ဖို့ ဆောင်ရွက်နေတယ်လို့ ဆိုပါတယ်။
ဒီနေ့ ဖေဖော်ဝါရီ ၁၇ ရက်မှာ စစ်ကောင်စီရဲ့ ပြည်ထဲရေးဝန်ကြီး ဒုဝန်ကြီး ဗိုလ်ချုပ်အောင်ကျော်ကျော်၊ တရုတ်နိုင်ငံရဲ့ ပြည်သူ့လုံခြုံရေးဌာနက လက်ထောက်ဝန်ကြီးနဲ့ ထိုင်းနိုင်ငံရဲ့ ကာကွယ်ရေးဝန်ကြီးဌာနက အထွေထွေ အတွင်းရေးမှူးတို့ဟာ မြဝတီမြို့သို့ ရောက်ရှိနေပြီး ငွေလိမ်ဂိုဏ်းကနေ ခေါ်ထုတ်ထားသူတွေကို သွားရောက် ကြည့်ရှုခဲ့ပါတယ်။
စစ်ကောင်စီအနေနဲ့ နယ်စပ်ဒေသရှိ အွန်လိုင်း ငွေလိမ်ဂိုဏ်းတွေကို အိမ်နီးချင်းနိုင်ငံနဲ့ ပူးပေါင်းပြီး တိုက်ဖျက်သွားမယ်လို့ ဆိုပါတယ်။
ပြီးခဲ့တဲ့ ဖေဖော်ဝါရီ ၅ ရက်မှာ ထိုင်း-မြန်မာနယ်စပ်ရှိ တာချီလိတ်၊ မြဝတီနဲ့ ဘုရားသုံးဆူမြို့ကို ထိုင်းဘက်က ပြီးခဲ့တဲ့ ဖေဖော်ဝါရီ ၅ ရက်ကစပြီး စက်သုံးဆီနဲ့ လျှပ်စစ်မီး ဖြတ်တောက်ခဲ့ပါတယ်။
စက်သုံးဆီနဲ့ လျှပ်စစ်မီးကို ဖြတ်တောက်ပြီးနောက် ကရင်-ထိုင်းနယ်စပ်မှာ လှုပ်ရှားတဲ့ ကရင် နယ်ခြားစောင့်တပ်- BGFနဲ့ ဒီမိုကရေစီအကျိုးပြု ကရင်တပ်မတော်- DKBA က အွန်လိုင်း ငွေလိမ်ဂိုဏ်းမှာ လူကုန်ကူးခံရတဲ့ နိုင်ငံခြားသားတွေကို ထိုင်းနိုင်ငံဘက် ဒီရက်ပိုင်း ပြန်လည် လွှဲပြောင်းပေးခဲ့ပါတယ်။
