ပျားကြီး၊ ဖေဖော်ဝါရီ ၁၄ ရက်၊ ရန်ကုန်
ရန်ကုန်မြို့မှာရှိတဲ့ ပုဂ္ဂလိကဆေးရုံကြီးတွေဖြစ်တဲ့ OSC၊ ဆာကူရာနဲ့ Grand Hantha အပါအဝင် ဆေးရုံ ၉ ခုကို စစ်ကောင်စီက ပိတ်သိမ်းဖို့ ညွှန်ကြားထားတယ်လို့ ကျန်းမာရေးဝန်ထမ်းတွေက ပြောပါတယ်။
CDM ဝန်ထမ်း ခန့်အပ်တယ်ဆိုတဲ့ စွပ်စွဲချက်နဲ့ တချို့ကို ယာယီ ပိတ်သိမ်းခိုင်းတာဖြစ်ပြီး တချို့ကိုတော့ အပြီးသတ် ပိတ်သိမ်းဖို့ ညွှန်ကြားထားတာ ဖြစ်ပါတယ်။
“အခုက ရန်ကုန်က ဆေးရုံတွေ အလှည့်ကျတာပေါ့။ သူတို့က ငွေရပေါက်လမ်း တွေ့သွားပြီလေ။ ဆေးရုံကြီးတွေက ပြန်ဖွင့်နိုင်ဖို့ သူတို့ကြိုးစားကြမှာပေါ့။ ဆေးရုံ အသေးလေးတွေကတော့ အထိနာမှာ။ CDM တွေ ခန့်လို့ ပိတ်ခိုင်းတာ” လို့ ရန်ကုန်မြို့ခံ ကျန်းမာရေးဝန်ထမ်းတစ်ဦးက ပြောပါတယ်။
အပြီးသတ် ပိတ်သိမ်းဖို့အထိ ညွှန်ကြားထားတဲ့ ဆေးရုံတွေက မြတ်တော်ဝင်၊ ကျန်းမာသုခနဲ့ ချမ်းမြေ့ဆေးရုံဖြစ်ပြီး ယာယီ ပိတ်ခိုင်းတဲ့ဆေးရုံတွေက OSC၊ ဆာကူရာ၊ Grand Hantha၊ ကောင်းစုဆောင်၊ ကောင်းနဲ့ သမိုင်းဆေးရုံဖြစ်ပြီး ၃ လကနေ ၁ နှစ်အထိ ပိတ်သိမ်းခိုင်းခဲ့တာလို့ ကျန်းမာရေးဝန်ထမ်းတွေက ပြောဆိုပါတယ်။
အခုလို ဆေးရုံတွေကို စစ်ကောင်စီက ပိတ်သိမ်းဖို့ ညွှန်ကြားထားတာနဲ့ ပတ်သက်ပြီးသက်ဆိုင်ရာ ဆေးရုံတွေကို ရွှေဖီမြေအနေနဲ့ဆက်သွယ်မေးမြန်းခဲ့ပေမဲ့ တစ်စုံတစ်ရာ ပြန်လည်ဖြေကြားတာ မရှိပါဘူး။
CDM ပြုလုပ်ထားတဲ့ ကျန်းမာရေး ဝန်ထမ်းနဲ့ပတ်သက်ပြီး အခဲမကျေ ဖြစ်နေတဲ့ စစ်ကောင်စီဟာ မန္တလေးမြို့ပေါ်က ပုဂ္ဂလိက ဆေးရုံ ၁၂ ခုထက်မနည်းကို ပြီးခဲ့တဲ့ ၂၀၂၃ ခုနှစ်ကတစ်ကြိမ်၊ ဖေဖော်ဝါရီ လဆန်းပိုင်းကတစ်ကြိမ် ပိတ်သိမ်းဖို့ ညွှန်ကြားခဲ့တာ ရှိပါတယ်။
