ပို့လဘား၊ ဖေဖော်ဝါရီ ၁၄ ရက်၊ ညောင်ရွှေ
ရှမ်းတောင် ညောင်ရွှေမြို့နယ်မှာ စစ်ကောင်စီတပ်နဲ့ ၎င်းရဲ့ လက်အောက်ခံ ပအိုဝ်းပြည်သူ့စစ်- PNO ပစ်ခတ်တဲ့ လက်နက်ကြီးကြောင့် အရပ်သားတစ်ဦး ထိခိုက်ဒဏ်ရာ ရရှိခဲ့တယ်လို့ ဒေသခံတစ်ဦးက ပြောပါတယ်။
မနေ့ ဖေဖော်ဝါရီ ၁၃ ရက် ညနေ ၆ နာရီဝန်းကျင်မှာ ညောင်ရွှေမြို့နယ် တောင်ပို့ကွဲရွာကို စစ်တပ်က လက်နက်ကြီး ပစ်ခတ်လို့ အရပ်သားတစ်ဦး ထိခိုက်ဒဏ်ရာ ရရှိခဲ့တာပါ။
“သူတို့တစ်ဖက်သတ်ဘဲ ပစ်နေကြတာ။ မနေ့ည အိပ်တဲ့အချိန်မှာလည်း သူတို့ ထပ်ပစ်လာတယ်။ နေအိမ်လည်း ထိပြီး မီးလောင်သွားတာ”
အလားတူ မနေ့မနက် ၁၁ နာရီခွဲမှာ ညောင်ရွှေမြို့နယ် ဘုရားတောင်ရွာလည်း စစ်တပ်က ပစ်ခတ်တဲ့ လက်နက်ကြီးကြောင့် ဒေသခံနေအိမ် ၂ လုံး ပျက်စီးခဲ့တယ်လို့ ဆိုပါတယ်။
ပြီးခဲ့တဲ့ ဖေဖော်ဝါရီ ၁၂ ရက်ကလည်း ညောင်ရွှေမြို့နယ် တောင်ပို့ကွဲရွာကို စစ်တပ်နဲ့ PNO က ပစ်ခတ်တဲ့ လက်နက်ကြီး ပေါက်ကွဲမှုကြောင့် ကလေးတစ်ဦးအပါအဝင် အရပ်သား ၂ ဦး သေဆုံးပြီး ၂ ဦး ထိခိုက်ဒဏ်ရာ ရရှိခဲ့တယ်။
