မိုင်းရူပ၊ ဖေဖော်ဝါရီ ၁၃ ရက်၊ သိန္နီ
ကိုးကန့်တပ်- MNDAA ထိန်းချုပ်ထားတဲ့ ရှမ်းမြောက် သိန္နီမြို့နယ် ဆိုင်းခေါင်ရွာက ရွာခံတွေ ခိုးစိုက်တဲ့ ၁ ဧကဝန်းကျင်ရှိတဲ့ ဘိန်းခြံကို TNLA က သွားရောက် ဖျက်ဆီးခဲ့တယ်လို့ ရွှေဖီမြေက စုံစမ်းသိရှိရပါတယ်။
အဲဒီဘိန်းစိုက်ခင်းကို ဖေဖော်ဝါရီ ၁၀ ရက်မှာ TNLA ရဲ့ ရဲတပ်ဖွဲ့နဲ့ ရပ်ရွာလုံခြုံရေးအဖွဲ့တွေ ပူးပေါင်းပြီး သွားရောက် ဖျက်ဆီးခဲ့တာ ဖြစ်ပါတယ်။
“တောနက်ထဲမှာ ခိုးစိုက်တာ။ ဘေးပတ်ပတ်လည်မှာလည်း တောတွေဘဲ။ သတင်းရလို့ သွားဖျက်တာ။ TNLA ကတော့ ထပ်မစိုက်ဖို့ သတိပေးတာ ရှိတယ်” လို့ ဖြစ်စဥ်သိရှိတဲ့ အမျိုးသားတစ်ဦးက ရွှေဖီမြေကို ပြောပါတယ်။
ဘိန်းစိုက်ပျိုးတဲ့ ဒေသခံတွေကတော့ အလုပ်အကိုင် မရှိတာကြောင့် ဘိန်းပင် ခိုးစိုက်တာလို့ သူက ဆက်ပြောပါတယ်။
TNLA ဟာ ၎င်းတို့ ထိန်းချုပ်ထားတဲ့ နေရာတွေမှာ မူးယစ်ဆေးဝါး သုံးစွဲသူနဲ့ ရောင်းဝယ်သူကို အရေးယူမှု ပြုလုပ်နေပြီး ပြီးခဲ့တဲ့ ဇန်နဝါရီလထဲ မူးယစ်ဆေးဝါး သုံးစွဲသူ ၁၂၆ ဦးနဲ့ ရောင်းဝယ်သူ ၁၃ ဦးကို ဖမ်းဆီးနိုင်ခဲ့တယ်လို့ TNLA က ထုတ်ပြန်ထားပါတယ်။
တစ်ဖက်မှာတော့ TNLA ထိန်းချုပ်ထားတဲ့ဒေသရှိ KTV တွေမှာ မူးယစ်ဆေးဝါး ပေါ်တင် ရနေပြီး TNLA တပ်ဖွဲ့ဝင်တချို့ပါ သုံးစွဲမှု ရှိနေတာကြောင့် အရေးယူပေးဖို့ ဒေသခံတွေက တောင်းဆိုနေကြပါတယ်။
