ခိုင်လေး၊ ဖေဖော်ဝါရီ ၁၃ ရက်၊ လက်ပံတန်း
ပဲခူးတိုင်း လက်ပံတန်းမြို့နယ် မကျီးကွင်းအုပ်စု ရွှေဘိုစုရွာမှာ ဒေသခံတွေဆီ စစ်မှုထမ်းကြေးဆိုပြီး ငွေ လိုက်တောင်းနေတဲ့ အုပ်ချုပ်ရေးမှူးနဲ့ ဇနီးကို ရွှေတန်းမြေ ပြည်သူ့ကာကွယ်ရေးတပ်ဖွဲ့က သေနတ်နဲ့ ပစ်ခတ်ခဲ့တာကြောင့် သေဆုံးသွားခဲ့တယ်လို့ ရွှေတန်းမြေ ပြည်သူ့ကာကွယ်ရေးတပ်ဖွဲ့တာဝန်ခံ ကိုကိုအောင်က ရွှေဖီမြေကို ပြောပါတယ်။
ပြီးခဲ့တဲ့ ဖေဖော်ဝါရီ ၁၁ ရက် ညနေ ၄ နာရီခွဲကျော်က အုပ်ချုပ်ရေးမှူးဖြစ်သူ သိန်းဝင်းနဲ့ ဇနီး စန်းစန်းတို့ရဲ့နေအိမ်ကို စစ်ဆေးဖို့ ဝင်လာချိန်မှာ သိန်းဝင်းဆိုသူက လက်ပစ်ဗုံးနဲ့ ခုခံဖို့ ပြင်ဆင်နေတာကြောင့် ရွှေတန်းမြေပြည်သူ့ကာကွယ်ရေးတပ်က သေနတ်နဲ့ ကျည် ၁၀ ချက် ပစ်ခတ်ခဲ့တာလို့ ဆိုပါတယ်။
“သူနဲ့အတူ ရှိနေတဲ့ အမျိုးသမီးပါ ထိမှန်သေဆုံးသွားတယ်။ အဲအိမ်မှာက သူတို့နှစ်ယောက်ဘဲ ရှိတာ။ မနေ့ ၁ နာရီလောက်က သူတို့ရွာ သုဿန်မှာဘဲ သင်္ဂြိုလ်တယ်။ ရွာသားတွေ လိုက်မပို့ဘူး။ သူမိသားစုလောက်ဘဲ ပါတယ်”
သူတို့နှစ်ဦးဟာ စစ်မှုထမ်းကြေးဆိုပြီး ဒေသခံတွေဆီ ငွေ အတင်းအကြပ် ကောက်ခံနေပြီး ငွေ မပေးနိုင်တဲ့ ဒေသခံတွေကို စစ်တပ်ထံ သတင်းပေး ဖမ်းဆီးခိုင်းတာရှိပြီး သူ့ရဲ့လုပ်ရပ်ကို တိုင်ကြားမယ့် ဒေသခံကိုလည်း ဖမ်းဆီးဖို့ လုပ်ဆောင်လာတာကြောင့် အရေးယူရခြင်းဖြစ်တယ်လို့ သူက ဆက်ပြောပါတယ်။
အခု လုပ်ဆောင်ချက်ဟာ သာယာဝတီခရိုင် တပ်ရင်း ၃၈၀၂ တပ်ခွဲ ၂ နဲ့ ရွှေတန်းမြေ ပြည်သူ့ကာကွယ်ရေးတပ်တို့ ပူးပေါင်း လုပ်ဆောင်ခဲ့တာဖြစ်ပြီး ၎င်းရဲ့ နေအိမ်မှာ လက်ပစ်ဗုံး ၁ လုံးနဲ့ ဖုန်း ၁ လုံး သိမ်းဆည်းရမိခဲ့တယ်လို့ ဆိုပါတယ်။
ရွှေတန်းမြေ ပြည်သူ့ကာကွယ်ရေးတပ်အနေနဲ့ လူငယ်တွေကို စစ်မှုထမ်းဖို့ အတင်းအကြပ် လူစုနေသူ၊ ဒေသခံနဲ့ တော်လှန်ရေးတပ်ဖွဲ့ကို ဒုက္ခပေးနေကြတဲ့ စစ်တပ်နဲ့ စစ်တပ်ထောက်တိုင်ကို အရှိန်မြင့် တိုက်ခိုက်သွားမှာ ဖြစ်တာကြောင့် ဒေသခံအနေနဲ့ စစ်တပ်အနီးအနား သွားလာနေထိုင်တာတွေ လုံးဝ မပြုလုပ်ကြဖို့လည်း အသိပေးထားပါတယ်။
