လွေးဇွန်မိုး၊ ဖေဖော်ဝါရီ ၁၂ ရက်၊ သီပေါ
တအာင်းတပ်- PSLF/TNLA ထိန်းချုပ်ထားတဲ့ ရှမ်းမြောက် သီပေါမြို့နယ် တုံစင့်ကျေးရွာက အသက် ၁၃ နှစ်အရွယ် စိုင်းလောဝ်ခမ်းဆိုသူဟာ မိုင်း နင်းမိပြီး ခြေထောက်တစ်ဖက် ပြတ်သွားပါတယ်။
မနေ့ ဖေဖော်ဝါရီ ၁၁ ရက် မနက် ၁၀ နာရီဝန်းကျင်မှာ စိုင်းလောဝ်ခမ်းဟာ သီပေါမြို့ရှိ စစ်ကောင်စီရဲ့ တပ်စခန်းဟောင်း ခြေလျင်တပ်ရင်း (ခလရ ၂၃)အနီးမှာ မိုင်းနင်းမိခဲ့တာလို့ ဖြစ်စဥ်သိရှိသူ အမျိုးသားတစ်ဦးက ပြောပါတယ်။
“၂၃ တပ်အနီးမှာ နင်းမိတာ။ ခြေထောက်တစ်ဖက် ဖြတ်လိုက်ရတယ်။ အဲမှာက မိုင်းခဏခဏ နင်းမိကြတယ်”
ဒဏ်ရာရတဲ့ စိုင်းလောဝ်ခမ်းကို သီပေါမြို့ရှိ နယ်စည်းမခြား ပရဟိတအသင်းက သွားရောက် သယ်ဆောင်ကာ အရေးပေါ် ကုသပေးခဲ့ပြီး လားရှိုး ပြည်သူ့ဆေးရုံသို့ ပို့ဆောင်ထားတယ်လို့ ဆိုပါတယ်။
ပြီးခဲ့တဲ့ ဇန်နဝါရီ ၁ ရက်ကနေ ဒီနေ့ ဖေဖော်ဝါရီ ၁၂ ရက်အထိ ရွှေဖီမြေက ရရှိထားတဲ့ စာရင်းအရ ရှမ်းမြောက် မူဆယ်၊ ကွတ်ခိုင်၊ မိုးမိတ်နဲ့ သီပေါမြို့နယ်မှာ မြေမြှုပ်မိုင်းနဲ့ ပေါက်ကွဲတတ်တဲ့ စစ်ကျန်လက်နက်ပစ္စည်းကြောင့် ကလေးငယ် ၂ ဦး သေဆုံးခဲ့ပြီး ကလေး ၃ ဦးအပါအဝင် အမျိုးသား ၈ ဦး ဒဏ်ရာ ရခဲ့ပါတယ်။
မြန်မာနိုင်ငံဟာ ကမ္ဘာမှာ မြေမြှုပ်မိုင်းနဲ့ ပေါက်ကွဲစေတတ်တဲ့ စစ်လက်နက်တွေကြောင့် သေဆုံးသူ အများဆုံးနိုင်ငံဖြစ်လာတယ်လို့ နိုင်ငံတကာ မြေမြှုပ်မိုင်းသုံးစွဲမှု ပပျောက်ရေး လှုပ်ရှားမှုအဖွဲ့- ICBL ရဲ့ ၂၀၂၄ ခုနှစ် နိုဝင်ဘာ ၂၀ ရက် ထုတ်ပြန်တဲ့ အစီရင်ခံစာမှာ ဖော်ပြထားပါတယ်။
ပြီးခဲ့တဲ့ ၂၀၂၃ ခုနှစ်အတွင်း မြေမြှုပ်မိုင်းနဲ့ ပေါက်ကွဲစေတတ်တဲ့ စစ်လက်နက်အကြွင်းအကျန်တွေကြောင့် မြန်မာနိုင်ငံတစ်ဝှမ်းက လူ ၁ ထောင်ကျော် (၁,၀၀၃ ဦး) သေဆုံးခဲ့တယ်လို့ ICBL က ထုတ်ပြန်ထားပါတယ်။
