ခိုင်လေး၊ ဖေဖော်ဝါရီ ၁၂ ရက်၊ ငဖဲ
မကွေးတိုင်း ငဖဲမြို့နယ် ပဒါန်းမြို့အနောက်ဘက် အမ်း-ပဒါန်း ကားလမ်းမပေါ်ရှိ စစ်ကောင်စီ တပ်စခန်းကုန်းတစ်ခုကို ချင်းဒေသ ကာကွယ်ရေးတပ်- အရှို (CDF-Asho)က သိမ်းယူပြီး တစ်ရက်အကြာမှာ အဲအနီးနားက ဒေသခံ ၁၆ ဦးကို စစ်ကောင်စီတပ်ဖွဲ့ဝင်က ဖမ်းဆီးသွားခဲ့တယ်လို့ CDF Asho မှ တာဝန်ရှိသူတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ ဖေဖော်ဝါရီ ၉ ရက် နေ့လယ် ၁ နာရီမှာ CDF Asho က အမ်း-ပဒါန်း ကားလမ်းပေါ်ရှိ ပျဥ်းဝ စစ်ဆေးရေးဂိတ်အနီးက စစ်တပ်စခန်းကုန်းကို သိမ်းပိုက်လိုက်တာဖြစ်ပါတယ်။
“ပစ်ခတ်ချိန် သိပ်မကြဘူး။ စစ်ကောင်စီတပ်ဖွဲ့ဝင်တွေ ဆုတ်သွားကြလို့ စခန်းကိုမီးရှို့ခဲ့တယ်” လို့ CDF Asho မှ တာဝန်ရှိသူက ရွှေဖီမြေကို ပြောပါတယ်။
စစ်တပ်က တိုက်ပွဲအပြီး ၁ ရက်အကြာမှာတော့ ဘုရားတောင်စခန်းကုန်းအနီးရှိ ဂုတ်ဝနဲ့ ရေနွယ်က အရှိုချင်းရွာမှ ဒေသခံတွေကို ဖမ်းဆီးခဲ့တယ်လို့ ဆိုပါတယ်။
“ရွာထဲကို ဝင်ဖမ်းတာဗျ။ ၁၆ ဦးလောက် ရှိမယ်။ အမျိုးသမီး ၄ ဦး ပါတယ်ဗျ။ ၃ ဦးတော့ ပြန်လွှတ်လာပြီ။ သူတို့ ပြောတာကြတော့ စစ်တပ်က ရိုက်နှက်စစ်ဆေးတာတွေတော့ ရှိတယ်။ ဘယ်လိုပုံစံမျိုးနဲ့ ရိုက်နှက်တယ်ဆိုတာကိုတော့ ကျနော်တို့ အတိအကျ မပြောနိုင်ဘူး” ဆိုပြီး သူက ဆက်ပြောပါတယ်။”
ကပစ ၁၄ မဟုတ်ရင် ပဒါန်းနားက အမတ ၃၇၅ တပ်ဘက်ကို ဖမ်းဆီးခေါ်ဆောင်သွားတာ ဖြစ်နိုင်တယ်လို့ သူက ပြောပါတယ်။
ဘုရားတောင်စခန်းကုန်း သိမ်းပိုက်ပြီးနောက် အနီးအနားရှိ ပျဉ်းဝ စစ်ဆေးရေးဂိတ်ရှိ စစ်သားအားလုံးက ပဒါန်းမြို့အနီးရှိ စခန်းဘက်ကို ဆုတ်ခွာထွက်ပြေးသွားကြတယ်လို့ CDF Asho ရဲ့ထုတ်ပြန်ချက်မှာ ဖော်ပြထားပါတယ်။
