လွေးထွေး၊ ဖေဖော်ဝါရီ ၁၂ ရက်၊ မြဝတီ
စစ်ကောင်စီတပ်က ထိုင်း-မြန်မာနယ်စပ် ကရင်ပြည်နယ် မြဝတီမြို့ထဲ စက်သုံးဆီ သယ်ယူပို့ဆောင်ခွင့် မပေးတာနဲ့ ထိုင်းနိုင်ငံဘက်က ကျားဖြန်တွေ အခြေချတပ်စွဲထားတယ်ဆိုတဲ့ အကြောင်းပြချက်နဲ့ မြဝတီမြို့ထဲ စက်သုံးဆီနဲ့လျှပ်စစ်မီး ဖြတ်တောက်ခဲ့တာကြောင့် စက်သုံးဆီ ပြတ်လပ်တဲ့ ပြဿနာကို ဒေသခံတွေ ကြုံနေရကြောင်း ဒေသခံအမျိုးသားတစ်ဦးက ပြောပါတယ်။
မြဝတီမြို့ ဘုရင့်နောင် ဈေးကြီးအနီးက PTT ဆီဆိုင်မှာလည်း မနေ့ ဖေဖော်ဝါရီ ၁၁ ရက် ညနေအထိ ကားနဲ့ ဆိုင်ကယ်တွေ တန်းစီနေရပြီး ဆိုင်ကယ်တစ်စီးကို ဓာတ်ဆီ ၅ ထောင်ကျပ်နဲ့ ကားတစ်စီးကိုတော့ ဒီဇယ် ၂ သောင်းကျပ်သာ အကန့်အသတ်နဲ့ ဖြည့်ပေးတယ်လို့ ဆိုပါတယ်။
မြဝတီဒေသခံ အမျိုးသားက “တစ်ပတ်ကျော်လာပြီ။ ဆီတန်းနေရတယ်။ လမ်းဘေးမှာ ရသလို ထည့်နေရတယ်။ ထိုင်းအထိလည်း သွားထည့်ရတယ်။ ဒီမှာက အရေးအကြောင်းဆို သွားရလာရတာ လွယ်ကူအောင်လို့သာ တချို့တွေက ဆီထည့်ထားကြတယ်။ မလိုအပ်ရင် မစီးတော့ဘူး” လို့ ပြောပါတယ်။
စစ်ကောင်စီက ပြီးခဲ့တဲ့ ဖေဖော်ဝါရီ ၇ ရက်ကစပြီး မွန်နဲ့ ကရင်ပြည်နယ်အစပ်မှာရှိတဲ့ စစ်ကောင်စီတပ်ရဲ့ ဇာသပြင် (ဂျိုင်းတံတား) စစ်ဆေးရေးဂိတ်ကနေ ကရင်ပြည်နယ်ဘက်သွားတဲ့ စက်သုံးဆီကားတွေ ပိတ်လိုက်တာလို့ ဆိုပါတယ်။
အလားတူ ထိုင်းဘက်ကလည်း ကျားဖြန်ရုံတွေ အခြေစိုက်ထားတယ်လို့ နာမည်ကြီးနေတဲ့ မြဝတီ၊ ရွှေကုက္ကို၊ တာချီလိတ် အပါအဝင် ထိုင်း-မြန်မာနယ်စပ်က မြို့ ၅ မြို့ကို ဖေဖော်ဝါရီ ၅ ရက်ကစပြီး စက်သုံးဆီနဲ့ လျှပ်စစ်မီးကို ပိတ်လိုက်တာ ဖြစ်ပါတယ်။
“ဒီကလူတွေ ကြည့်ရတာ ဒုက္ခအရောက်ဆုံးက ဈေးသည်တွေပါ။ ပြီးတော့ ဆီ အသုံးပြုရတဲ့ လုပ်ငန်းတွေပေါ့။ ဒါပေမဲ့ လူထုတွေက ဘာမှမတတ်နိုင် မပြောနိုင်ကြဘူးလေ” လို့ မြဝတီမြို့မှ တစ်နိုင်တစ်ပိုင် ဆီဆိုင်ပိုင်ရှင် အမျိုးသားတစ်ဦးက ပြောပါတယ်။
နှစ်ဖက်စလုံးက စက်သုံးဆီ ပိတ်လိုက်တာဟာ အရပ်သားအပေါ် ပြင်းပြင်းထန်ထန် ရိုက်ခတ်နေတာကို တွေ့နေရတာကြောင့် သက်ဆိုင်ရာက အမြန်ဆုံး နည်းလမ်းနဲ့ ဖြေရှင်းပေးဖို့ကိုလည်း သူက တောင်းဆိုထားပါတယ်။
ဒီနေ့ ဖေဖော်ဝါရီ ၁၂ ရက် မနက်ပိုင်းအထိ ထိုင်း-မြန်မာနယ်စပ် တစ်လျှောက်လုံးမှာ ထိုင်းဘက်က လုံခြုံရေး တင်းကြပ်ထားပြီး စက်သုံးဆီ ခိုးသယ်လာသူတွေကိုလည်း ဖမ်းဆီးစစ်ဆေးတာတွေ လုပ်နေတယ်လို့ သိရပါတယ်။
