ပျားကြီး၊ ဖေဖော်ဝါရီ ၁၁ ရက်၊ ကနီ
စစ်ကိုင်းတိုင်း ကနီမြို့နယ် နတ်လာဘို့ မြောက်ရွာကို စစ်ကောင်စီက စက်တပ်လေထီး (Paramoter)နဲ့ ဗုံးကြဲချမှုကြောင့် အမျိုးသားတစ်ဦး သေဆုံးခဲ့တယ်လို့ ဒေသခံတွေက ပြောပါတယ်။
ဒီနေ့ ဖေဖော်ဝါရီ ၁၁ ရက် မနက်အစောပိုင်း ၁၂ နာရီခွဲက စစ်ကောင်စီရဲ့အနောက်မြောက်တိုင်း စစ်ဌာနချုပ်ကနေ တက်လာတဲ့ စက်တပ်လေထီးပေါ်မှ နတ်လာဘို့ မြောက်ရွာကို ၁၂၀ မမ ဗုံးသီးနဲ့ ကြဲချတိုက်ခိုက်ခဲ့တာ ဖြစ်ပါတယ်။
“သတိထားဖို့ ပြောနေကြတဲ့ကြားက ကြဲသွားတာပဲဗျ။ အမျိုးသားက ခြေတွေ လက်တွေ အပိုင်းပိုင်း ပြတ်ထွက်ပြီး ဆုံးသွားတာ။ အမျိုးသမီးကြီးကတော့ အခုဆေးကုနေတယ်” လို့ ဒေသခံတစ်ဦးက ပြောပါတယ်။
စစ်ကောင်စီရဲ့ စက်တပ်လေထီးနဲ့ ဗုံးကြဲတိုက်ခိုက်မှုကြောင့် သေဆုံးသူဟာ အသက် ၄၉ နှစ်အရွယ် အမျိုးသားဖြစ်ပြီး ၅၇ နှစ်အရွယ် အမျိုးသမီးတစ်ဦးလည်း ထိခိုက်ဒဏ်ရာ ရရှိခဲ့ပါတယ်။
စစ်ကောင်စီဟာ ၂၀၂၅ ခုနှစ် နှစ်ဆန်းပိုင်းကစပြီး စစ်ကိုင်း၊ မကွေးနဲ့ မန္တလေးတိုင်းမှာ စစ်တပ်လေထီး (Paramoter)နဲ့ လူထုအပေါ် ပစ်မှတ်ထားပြီး ဗုံးကြဲတိုက်ခိုက်မှု မကြာခဏ ပြုလုပ်လာတာကြောင့် ကလေးငယ်အပါအဝင် လူသေဆုံးမှု တိုးလာနေပါတယ်။
