အိုက်ပွီး၊ ဖေဖော်ဝါရီ ၁၀ ရက်၊ မောင်တော
ရခိုင်ပြည်နယ် မောင်တောမြို့နယ် ခုံတိုင်ကျေးရွာက ကိုယ်ဝန်ဆောင် အမျိုးသမီးတစ်ဦးနဲ့ အသက်မပြည့်သေးတဲ့ ကလေးငယ်နှစ်ဦးအပါအဝင် ၁၇ ဦးကို အာရက္ခတပ်တော်- AA က စစ်မှုထမ်းဖို့ ဖမ်းဆီးခေါ်ဆောင်သွားတယ်လို့ ဒေသခံတွေဆီက သိရပါတယ်။
မောင်တောမြို့နဲ့ မိုင် ၃၀ ကျော် ကွာဝေးပြီး အိမ်ခြေ ၁၈၀ ကျော်ရှိတဲ့ ခုံတိုင်ရွာကို AA တပ်ဖွဲ့ဝင် အင်အား ၁၀၀ ခန့်က ပိတ်ဆို့ပြီး စစ်မှုထမ်းဖို့အတွက် အရပ်သားတွေကို အတင်းအဓမ္မ ဖမ်းဆီးခေါ်ဆောင်သွားတာ ဖြစ်ပါတယ်။
“ရွာကို ဝိုင်းထားပြီး တစ်အိမ်တက်ဆင်း ဖမ်းဆီးခေါ်တာပါ။ အစတော့ ၄၀ ကျော် ခေါ်မယ်ပြောတယ်။ နောက်တော့ ကလေးအမေတွေ၊ အသက်မပြည့်သေးတဲ့သူတွေပါ ဖမ်းဆီးခေါ်တာကြောင့် ရွာသားတွေက ဝိုင်းတားဆီးရင်း ရုန်းရင်းဆန်ခတ်ဖြစ်သွားတော့ ၁၇ ယောက်လောက် ခေါ်သွားတယ်။ အဲဒီထဲမှာ အသက် ၁၄ နှစ်အရွယ် မိန်းကလေးတစ်ဦး၊ ကိုယ်ဝန်ဆောင်တစ်ဦး၊ အသက်မပြည့်တဲ့ ယောကျာ်းလေးတစ်ယောက် ပါတယ်” လို့ ခုံတိုင်ရွာခံတစ်ဦးက ရွှေဖီမြေသို့ ပြောပါတယ်။
ဒါ့အပြင် ဖမ်းဆီးခံရသူတွေထဲ အသက်မပြည့်တဲ့သူ၊ ကိုယ်ဝန်ဆောင်၊ အသက် ၅၀ ကျော် အသက်ကြီးသူ ပါတာကြောင့် ပြန်လွှတ်ပေးဖို့ ခုံတိုင်ရွာခံတွေက AA နယ်မြေမှူးဆီ ဆန္ဒပြတောင်းဆိုကြပေမဲ့ AA က ပစ်ဖောက်ခြိမ်းခြောက်ခဲ့တယ်လို့ သိရပါတယ်။
“ကျနော်တို့က ဖမ်းဆီးခံရတဲ့သူတွေ ပြန်လွှတ်ပေးဖို့ တောင်းဆိုတာပါ။ အဲဒါကို နယ်မြေမှူးက သူ့အနေနဲ့ မသိဘူး။ အထက်က အမိန့်လို့ ပြောတယ်။ အထက်ကို တောင်းဆိုလို့ ပြောတယ်။ ပြီးတော့ ရွာသားတွေ လူစုခွဲအောင် သေနတ် သုံးချက် ပစ်ဖောက်တယ်။ အခုဆန္ဒပြတောင်းဆိုတဲ့ ဗွီဒီယိုတွေ ပုံတွေ လိုင်းပေါ် တင်ရင် ထပ်ဖမ်းမယ်လို့ ခြိမ်းခြောက်သွားတယ်” လို့ အထက်ပါ ခုံတိုင်ရွာခံက ဆက်ပြောပါတယ်။
ပြီးခဲ့တဲ့ ၂၀၂၄ ခုနှစ်ကလည်း ခုံတိုင်ရွာက အမျိုးသား ၆ ဦး၊ ၂၀၂၅ ခုနှစ် ဖေဖော်ဝါရီလ ပထမအပတ်မှာ အမျိုးသား ၅ ဦး စုစုပေါင်း အမျိုးသား ၁၁ ဦးကို ပြည်သူ့စစ်မှုထမ်းဖို့ AA က ဖမ်းဆီးခေါ်ဆောင်သွားပြီး အခုတစ်ခါ တတိယအကြိမ်မြောက် ဖမ်းဆီးခေါ်ဆောင်တာ ဖြစ်ပါတယ်။
ဒါ့အပြင် ဇန်နဝါရီ ၂၇ ရက်ကလည်း မောင်တောမြို့နယ် ကိုင်းကြီး (မြို)ရွာက ကျေးရွာအုပ်ချုပ်ရေးမှူးကို AA ခန့်ထားတဲ့ အမှတ် ၄ နယ်မြေမှုး ဦးခင်ဇော်လင်းက ခေါ်ယူပြီး တစ်အိမ်တစ်ယောက်နှုန်း ပြည်သူ့စစ်မှုထမ်းဖို့အတွက် လူစုပေးဖို့ ညွှန်ကြားထားတယ်လို့ ဒေသခံတွေဆီက သိရပါတယ်။
အလားတူ ၂၀၂၄ ခုနှစ် ဒီဇင်ဘာလ နောက်ဆုံးမှာလည်း မောင်တောမြို့နယ် သီဟိုအေး၊ ကိုင်းကြီး၊ သစ်တုံနားခွဆုံ၊ နန်းရာကိုင်း၊ ရွေတိုင်၊ လေးမြိုကေသီနဲ့ ဘောင်ရွာက မြိုအမျိုးသား ၉၀ ကျော်ကို AA က စစ်မှုထမ်းဖို့ ဖမ်းဆီးခေါ်ဆောင်ခဲ့ပါတယ်။
အဲဒီ ၉၀ ကျော်ထဲက အသက်မပြည့်သေးသူ၊ ကျန်းမာရေး မကောင်းတဲ့သူ၊ တစ်အိမ် နှစ်ယောက် ပါသွားသူတွေကို ပြီးခဲ့တဲ့ ဖေဖော်ဝါရီလက ပြန်လွှတ်ပေးခဲ့တယ်လို့ သိရပါတယ်။
မောင်တောမြို့နယ်မှာ AA က အခုလို စစ်မှုထမ်းဖို့ ဖမ်းဆီးခေါ်ဆောင်တာကြောင့် ဒေသခံ မြိုလူမျိုးတချို့ဟာ ဘင်္ဂလားဒေ့ရှ်နိုင်ငံဘက် မိသားစုအလိုက် ပြောင်းရွှေ့နေထိုင်သူလည်း ရှိလာတယ်လို့ ဒေသခံတွေက ပြောဆိုပါတယ်။
