လွေးထွေး၊ ဖေဖော်ဝါရီ ၁၀ ရက်၊ မြဝတီ
ထိုင်း-မြန်မာနယ်စပ် မြဝတီမြို့မှာ ထိုင်းဘက်က စက်သုံးဆီ တင်သွင်းခွင့် ပိတ်လိုက်တာကြောင့် ဒေသခံတွေက ထိုင်းနိုင်ငံ မဲဆောက်မြို့အထိ စက်သုံးဆီအတွက် တန်းစီပြီး သွားရောက် ဝယ်ယူနေရတယ်လို့ မြဝတီမြို့ခံ အမျိုးသားတစ်ဦးရဲ့ ပြောပြချက်အရ သိရပါတယ်။
ပြီးခဲ့တဲ့ ဖေဖော်ဝါရီ ၅ ရက်ကတည်းက ကျားဖျန့်တွေ အခြေချတဲ့ မြဝတီမြို့ထဲ ထိုင်းဘက်က လျှပ်စစ်မီးနဲ့ စက်သုံးဆီ တင်သွင်းခွင့် ပိတ်လိုက်တာကြောင့် မြဝတီမြို့က ဆီဆိုင်တွေမှာ ဆီပြတ်လပ်နေသလို နေရာတချို့မှာတော့ ဈေးကြီးကြီးနဲ့ ပေးဝယ်နေရပါတယ်။
“ဆိုင်ကယ်သမားတွေက ဒီမှာ ဝယ်လို့ ရသေးတယ်။ နေရာတချို့မှာဘဲ အလုအယက် မတန်မရာ ပေးပြီး ထည့်ကြတာဘဲ။ ကားတော့ ထိုင်းဘက် သွားထည့်ကြတာပေါ့”
ကားတွေဟာ ထိုင်းဘက်ခြမ်းအထိ တိုင်ဂီအပြည့် သွားထည့်တာ ရှိပေမဲ့ ပုံး၊ ဂါလံနဲ့ မြဝတီဘက် ပြန်သည်လာခွင့် မရှိကြောင်း အထက်ပါ အမျိုးသားက ဆက်ပြောပါတယ်။
ဒါ့အပြင် စက်သုံးဆီ သွားရောက် ဝယ်ယူတဲ့ ယာဉ်တွေ များတာကြောင့် ထိုင်း-မြန်မာ နယ်စပ် ချစ်ကြည်ရေးတံတားပေါ် ဒီနေ့မနက် ၉ နာရီခန့်အထိ ယာဉ်တွေ ပိတ်ဆို့နေပါတယ်။
မြဝတီမြို့ထဲ ထိုင်းက စက်သုံးဆီ တင်သွင်းခွင့် ပိတ်လိုက်တဲ့ တစ်ပတ်နီးပါးအတွင်း ဓာတ်ဆီ၊ ဒီဇယ် တစ်လီတာကို ၁ သောင်းခွဲ ဝန်းကျင်အထိ မြှင့်တက်လာသလို နေရာတချို့မှာတော့ ဆီ ပြတ်လပ်နေပါတယ်။
မြဝတီမှာ ဖေဖော်ဝါရီ ၄ ရက်အထိတော့ စက်သုံးဆီ တစ်လီတာ ၆ ထောင်ကျပ်ခန့်သာ ရှိခဲ့ပါတယ်။
ပြီးခဲ့တဲ့ ဖေဖော်ဝါရီ ၇ ရက်ကလည်း ထိုင်းကနေ မြဝတီမြို့ဘက် ရောင်းဖို့ စက်သုံးဆီ ခိုးသယ်လာတဲ့ ထိုင်းနိုင်ငံသား ယာဉ်မောင်းအမျိုးသားနဲ့ မြန်မာအမျိုးသမီးကို ထိုင်းရဲက ဖမ်းဆီးခဲ့ပါတယ်။
