ခိုင်လေး၊ ဖေဖော်ဝါရီ ၁၀ ရက်
ပြီးခဲ့တဲ့ ဇန်နဝါရီလအတွင်း စစ်ကောင်စီတပ်သား ၃၁ ဦးကို စစ်တပ်ကနေ ခေါ်ထုတ်နိုင်ခဲ့တယ်လို့ ပြည်သူ့ရင်ခွင်က မနေ့ ဖေဖော်ဝါရီ ၉ ရက်မှာ ထုတ်ပြန်လာပါတယ်။
ပြည်သူ့ရင်ခွင်ကို ဆက်သွယ်လာတာကြောင့် ခေါ်ထုတ်နိုင်ခဲ့တာဖြစ်ပြီး သူတို့နဲ့အတူ လက်နက် ၁၅ လက်လည်း ယူဆောင်နိုင်ခဲ့တယ်လို့ ဆိုပါတယ်။
အလင်းဝင်လာချင်သူတွေကို မြေပြင်အခြေအနေပေါ် မူတည်ပြီး ကူညီဆောင်ရွက်ပေးတာမျိုးတွေ ရှိသလို တပ်ထဲကနေ ထွက်လိုသူတွေကိုလည်း ပြည်သူ့ရင်ခွင်အနေနဲ့ ကြိုဆိုတယ်လို့ ပြည်သူ့ရင်ခွင်အဖွဲ့မှ တာဝန်ရှိသူတစ်ဦးက ရွှေဖီမြေကို ပြောပါတယ်။
“သူတို့ သွားချင်တဲ့နေရာတွေဆို လုံခြုံရေး အခြေအနေပေါ် မူတည်ပြီး ပို့ဆောင်ပေးပါတယ်။ လက်နက်နဲ့ ဝင်လာတဲ့သူတွေကိုတော့ NUG(MOD) လမ်းညွှန်မှုနဲ့ ဆောင်ရွက်ပေးတာပါ။ အလင်းဝင် ဘက်ပြောင်းလာသူတွေကို ကျနော်တို့ ရဲဘော်ရဲဘက်တွေလိုပဲ ဆက်ဆံပါတယ်ဗျ”
ဒီအရေအတွက်ဟာ စစ်တပ်က စစ်မှုထမ်းဖို့ လူထုတွေကို ဖမ်းဆီးစုဆောင်းတဲ့ အရေအတွက်နဲ့ နှိုင်းယှဉ်ရင် နည်းပါးပေမဲ့ ၃၁ ဦးရဲ့ အသက်ကို ကယ်တင်နိုင်ခဲ့တယ်လို့ ဆိုပါတယ်။
စစ်မှုထမ်းဖို့ စုဆောင်းခံရသူအနေနဲ့ ကိုယ်တိုင်ဖြစ်စေ၊ မိသားစုဝင်နဲ့ မိတ်ဆွေတွေကနေတဆင့်ဖြစ်စေ ပြည်သူ့ရင်ခွင်အဖွဲ့ထံ လာရောက် ဆက်သွယ် တိုင်ပင်နိုင်ပြီး စစ်တပ်ကို စွန့်ခွာနိုင်ဖို့ ကူညီဆောင်ရွက်ပေးမယ်လို့လည်း ပြောဆိုထားပါတယ်။
ပြည်သူ့ရင်ခွင်အဖွဲ့ဟာ စစ်တပ်နဲ့ ၎င်းရဲ့ လက်အောက်ခံ ရဲတပ်ဖွဲ့မှ စွန့်ခွာလိုသူတွေကို ကူညီဆောင်ရွက်ပေးနေတဲ့ လွပ်လပ်တဲ့ အဖွဲ့အစည်းတစ်ခုဖြစ်ပြီး NUG ကာကွယ်ရေးဝန်ကြီးဌာနနဲ့ မိတ်ဖက်အဖွဲ့အစည်းအနေနဲ့ ပူးပေါင်းလုပ်ဆောင်နေတဲ့ အဖွဲ့ ဖြစ်ပါတယ်။
