မိုင်းရူပ၊ ဖေဖော်ဝါရီ ၉ ရက်၊ မိုးမိတ်
ရှမ်းမြောက် မိုးမိတ်မြို့နယ် နမ့်ဥမ္မာကျေးရွာမှာ အမျိုးသမီးတစ်ဦး သတ်ခံရပြီး ၂ ပတ်ကျော် ကြာတဲ့အထိ တရားခံကို ဖမ်းဆီးရမိတာ မရှိသေးကြောင်း ရွှေဖီမြေက စုံစမ်းသိရှိရပါတယ်။
ပြီးခဲ့တဲ့ ဇန်နဝါရီ ၂၂ ရက်မှာ မိုးမိတ်မြို့နယ် နမ်ဥမ္မာရွာခံ မဂျီပို့မီးဆိုသူဟာ သူငယ်ချင်းနဲ့အတူ ထင်းခွေသွားစဥ် တောထဲ သတ်ခံရတာလို့ ဖြစ်စဥ်သိရှိသူတစ်ဦးက ရွှေဖီမြေကို ပြောပါတယ်။
“တောထဲမှာ ထင်းခွေသွားရင်း အသတ်ခံရတာ။ သတ်တဲ့ တရားခံကို မမိသေးဘူး” လို့ ဖြစ်စဥ်သိရှိတဲ့ အမျိုးသားတစ်ဦးက ရွှေဖီမြေကို ပြောပါတယ်။
သေဆုံးသွားတဲ့ မဂျီပို့မီးဆိုသူဟာ အိမ်ထောင်ရေးကိစ္စ အရှုပ်အရှင်း ရှိထားသူဖြစ်ပြီး ၎င်းကို သတ်သွားတဲ့ တရားခံကို ဖမ်းဆီးရမိရေး တအာင်းတပ်မတော်- TNLA ရဲ့ ရဲတပ်ဖွဲ့က ဆက်လက် စုံစမ်းနေတယ်လို့ သိရပေမဲ့ အသေးစိတ် ဆက်လက်စုံစမ်းနေဆဲ ဖြစ်ပါတယ်။
လက်ရှိမှာ မိုးမိတ်မြို့ကို TNLA က ထိန်းချုပ်ထားပြီး မြို့ပြင်မှာတော့ ကချင်တပ်မတော်- KIA၊ ရှမ်းတပ်မတော်- SSPP နဲ့ ပြည်သူ့ကာကွယ်ရေးတပ်- PDF လည်း သွားလာနေကြပါတယ်။
