လွေးထွေး၊ ဖေဖော်ဝါရီ ၉ ရက်၊ မြဝတီ
ထိုင်း-မြန်မာနယ်စပ်မြို့ဖြစ်တဲ့ မြဝတီမြို့မှာ ထိုင်းဘက်က စက်သုံးဆီ တင်သွင်းခွင့် ပိတ်လိုက်တာကြောင့် စက်သုံးဆီ တစ်လီတာ ၁ သောင်းခွဲအထိ ဈေးမြှင့်နေပြီး နေရာတချို့မှာတော့ စက်သုံးဆီ ပြတ်လပ်နေတယ်လို့ မြဝတီဒေသခံ အမျိုးသားတစ်ဦးက ပြောပါတယ်။
ပြီးခဲ့တဲ့ ဖေဖော်ဝါရီ ၅ ရက်ကတည်းက ကျားဖျန့်တွေ အခြေချထားတဲ့ မြဝတီမြို့ဘက် ထိုင်းဘက်က လျှပ်စစ်မီးနဲ့ စက်သုံးဆီ ဖြတ်တောက်လိုက်တာပဲ ဖြစ်ပါတယ်။
မြဝတီဒေသခံ အမျိုးသားတစ်ဦးက “ဆီ စပိတ်ကတည်းက ဒီနေ့အထိ အလုအယက် တန်းစီပြီး ဝယ်ရတာ။ တချို့ ဆီဆိုင်က ပိတ်လိုက်ရပြီ။ အခု လူထုတွေ အရမ်းခက်ခဲနေကြပြီ။ ဘာလုပ်လို့ လုပ်ရမလဲ မသိကြဘူး” လို့ ပြောပါတယ်။
ထိုင်းဘက်က စက်သုံးဆီ ပိတ်လိုက်တာဟာ ကျားဖျန့်လုပ်ငန်းကို ထိခိုက်မှု မရှိစေဘဲ အခြေခံ လက်လုပ်လက်စား လူထုတွေကိုသာ တိုက်ရိုက် ထိခိုက်နေတယ်လို့လည်း နောက်ထပ် ဆီဆိုင်ပိုင်ရှင် အမျိုးသမီးတစ်ဦးက ပြောပါတယ်။
“အဲကျားဖျန်တွေက သူတို့ဟာသူတို့ ကိုယ်ပိုင်မီးနဲ့။ ဆီဆိုလည်း အရင်ကတည်းက အလုံအလောက် လှောင်ထားကြတာ။ အခု တစ်နေ့တစ်န့ ဒုက္ခရောက်နေကြတာက သာမန် ဈေးသည်တွေပေါ့။ ကျမတို့ဆိုင်ဆို ဆီတစ်စက်မှ မရှိတော့ မနေ့ကတည်းက ပိတ်လိုက်ရပြီ”
ဆီဈေး မြှင့်တက်တာနဲ့ ပြတ်လပ်တဲ့ ပြဿနာကို သက်ဆိုင်ရာက အမြန်ဆုံး ဖြေရှင်းပေးဖို့နဲ့ အခြေခံလူထုတွေအတွက် ထည့်သွင်းစဉ်းစားပေးဖို့ကိုလည်း သူမက တောင်းဆိုပါတယ်။
ဖေဖော်ဝါရီ ၅ ရက် မတိုင်ခင်အထိ မြဝတီမြို့မှာ ဓာတ်ဆီ၊ ဒီဇယ် တစ်လီတာကို ၆ ထောင်ဝန်းကျင်သာ ရှိခဲ့ပါတယ်။
ပြီးခဲ့တဲ့ ဖေဖော်ဝါရီ ၇ ရက်ကလည်း ထိုင်း-မြန်မာနယ်စပ် ဖိုးဖမြို့နယ်က စစ်ဆေးရေးဂိတ်မှာ စက်သုံးဆီ ခိုးသယ်လာပြီး မြဝတီမြို့သို့ ပြန်ရောင်းမယ့် ယာဉ်မောင်းအမျိုးသားနဲ့ အမျိုးသမီကို ထိုင်း ရဲတပ်ဖွဲ့က ဖမ်းဆီးထိန်းသိမ်းခဲ့ပါတယ်။
