အင်းငယ်၊ ဖေဖော်ဝါရီ ၈ ရက်၊ အင်းလေး
ရှမ်းတောင် ညောင်ရွှေမြို့နယ် အင်းလေးဒေသ ရေပူကျေးရွာအုပ်စု ရေပူရွာမှာ လက်နက်ကြီး ကျရောက်မှုကြောင့် လူနေအိမ်တစ်လုံး မီးလောင်ပြာကျ ပျက်စီးခဲ့တယ်လို့ ဒေသတွင်း နေထိုင်သူတွေက ပြောပါတယ်။
မနေ့ ဖေဖော်ဝါရီ ၇ ရက် နေ့လယ် ၃ နာရီခန့်က စံကားအင်း(တောင်ပိုင်းအင်း) အနောက်ဘက်ခြမ်းမှာ တပ်စွဲထားတဲ့ စစ်တပ်၊ ပအိုဝ်းပြည်သူ့စစ်- PNA ပူးပေါင်းတပ်က ရည်ရွယ်ချက်ရှိရှိ ပစ်ခတ်ခဲ့တာပဲ ဖြစ်ပါတယ်။
အင်းလေး လူ့အခွင့်အရေးအဖွဲ့ ပြန်ကြားရေး တာဝန်ရှိသူတစ်ဦးက “ရွာတည်နေရာက စံကားအင်းနဲ့ ဖယ်ခုံအင်းကြားမှာ ရှိတာပါ။ လက်နက်ကြီးအသံကြောင့် အသက်အရွယ်မရွေး အားလုံး ထိတ်လန့်နေကြပါတယ်။ ပျက်စီးမှုက တော်တော်များပါတယ်။ ရဲဘော်တွေ ဝိုင်းငြိမ်းလိုက်ပါတယ်” လို့ ပြောပါတယ်။
မီးလောင်ကျွမ်းမှုမှာ တစ်နာရီခန့် ကြာမြင့်ခဲ့ပြီး အင်းလေး ပြည်သူ့ကာကွယ်ရေးတပ်- IPDF က ဝင်ရောက်ငြိမ်းသတ်ကူခဲ့ရတယ်လို့ မြေပြင်သတင်းအရင်းအမြစ်တွေဆီက သိရပါတယ်။
ရေပူရွာဟာ ရှမ်းတောင်အတွင်း လက်နက်ကြီးဒဏ်ခံရမှု အများဆုံးဖြစ်ပြီး ဇန်နဝါရီ ၂၉ ရက်ကလည်း ဖယ်အင်း အနောက်ဘက်ခြမ်း နန်းတောင်းနဲ့ မိုးဦးမှာ တပ်စွဲထားတဲ့ စစ်ကောင်စီ ပူးပေါင်းတပ်က လက်နက်ကြီး ၂၂ ကြိမ် ပစ်ခတ်ခဲ့ပါသေးတယ်။
ရေပူရွာအတွင်း နေထိုင်သူ အမျိုးသမီးတစ်ဦးက “လက်နက်ကြီးကတော့ မကြာမကြာ ကျတယ်။ တော်တော်များက အိမ်မရှိတဲ့ဘက်တွေ ရွာစွန်တွေဘက်တွေ ကျတာ။ အခု ဒီတခေါက်မှ အိမ်ကို ထိတာ။ တိုက်ပွဲလည်း ဒီမှာက ခဏခဏပဲ ရိုးနေပြီ။ ဝုန်းဒိုင်းဆို ပြေးကြ။ နည်းနည်းငြိမ်ရင် ပြန်နေကြပေါ့” လို့ ပြောပါတယ်။
အလားတူ ဖေဖော်ဝါရီ ၅ ရက်ကလည်း ရေပူရွာအနီးက ဘုရားတောင်လွယ်နွဲ့ရွာကို စစ်တပ်က လက်နက်ကြီး ပစ်ခတ်ခဲ့ရာ စစ်ဘေးရှောင်အပါအဝင် ရွာခံ ၃ ဦး သေဆုံးပြီး ၆ ဦး ထိခိုက်ဒဏ်ရာ ရခဲ့တယ်လို့ သိရပါတယ်။
