ပျားကြီး၊ ဖေဖော်ဝါရီ ၇ ရက်၊ မန္တလေး
မန္တလေးမြို့ပေါ်မှာရှိတဲ့ ပုဂ္ဂလိကဆေးရုံ ၇ ခုကို စစ်ကောင်စီက အာဏာသုံးပြီး ပိတ်သိမ်းခိုင်းထားတယ်လို့ ကျန်းမာရေးဝန်ထမ်းတွေက ပြောပါတယ်။
ဝန်ထမ်း ခန့်ထားမှုနဲ့ ဆေးကုသပေးမှုနဲ့ပတ်သက်ပြီး ကျေနပ်ဖွယ်အထောက်အထား တင်ပြနိုင်မှု မရှိတာကြောင့်ဆိုတဲ့ အကြောင်းပြချက်နဲ့ ဆေးရုံတွေကို ပိတ်ဖို့ ပြီးခဲ့တဲ့ ရက်ပိုင်းအတွင်း ညွှန်ကြားခဲ့တာဖြစ်ပါတယ်။
“CDM တွေနဲ့ပတ်သက်ပြီး သူတို့အခုချိန်ထိအခဲမကျေသေးဘူး။ နောက်ပြီး နယ်ဖက်တွေမှာ ပစ်ခံရလို့ ဒဏ်ရာရလာတဲ့ လူနာမျိုးတွေကို ကုသပေးတယ်ဆိုပြီး စွပ်စွဲတာပေါ့။ အဲ့ဒါကြောင့် ပိတ်ခိုင်းတာ” လို့ အမည်မဖော်လိုသူ ကျန်းမာရေးဝန်ထမ်းတစ်ဦးက ပြောပါတယ်။
ပန်းလှိုင်၊ လန်ဒန်၊ မြတ်ချယ်ရီ၊ မြတ်ဝေလျှံ၊ မင်္ဂလာမျိုးဆက်၊ ဇီဝကနဲ့ ငြိမ်းချမ်းဆေးရုံတွေကို ပိတ်ဖို့ စစ်ကောင်စီ ညွှန်ကြားထားခဲ့တာဖြစ်ပြီး လတ်တလောမှာ ကုသပေးနေတဲ့လူနာ ရှိနေသေးတာကြောင့် ဆေးရုံအားလုံးဟာ ဖေဖော်ဝါရီ ၂၈ ရက်အထိ ဆက်လက် ဖွင့်လှစ်ထားမှာ ဖြစ်တယ်လို့ ပိတ်သိမ်းခံရတဲ့ ဆေးရုံတစ်ခုမှာ တာဝန်ထမ်းဆောင်နေတဲ့ ဝန်ထမ်းတစ်ဦးက ဆိုပါတယ်။
အခုလို ဆေးရုံတွေ ပိတ်ပင်ဖို့ ညန်ကြားချက် မထုတ်ခင် ပြီးခဲ့တဲ့ ၂၀၂၄ ခုနှစ် နှစ်ကုန်ပိုင်းကစပြီး အဲဒီဆေးရုံတွေကို စစ်ကောင်စီက မကြာခဏ စီးနင်းဝင်ရောက်စစ်ဆေးမှုလည်း ပြုလုပ်လေ့ ရှိတယ်လို့ ဝန်ထမ်းတွေက ပြောပါတယ်။
အခုလို စစ်ကောင်စီရဲ့ ပုဂ္ဂလိကဆေးရုံတွေ အဓမ္မပိတ်သိမ်းခံရမှုဟာ ၂၀၂၃ ခုနှစ်ကလည်း မြို့တော်၊ ကန့်ကော်နဲ့ နန်းတော်ဆေးရုံကြီးအပါအဝင် ဆေးရုံပေါင်း ၅ ခုကို CDM ပြုလုပ်ထားတဲ့ ကျန်းမာရေးဝန်ထမ်းတွေကူိ အလုပ်ခန့်အပ်မှုကြောင့်ဆိုတဲ့အကြောင်းပြချက်နဲ့ လုပ်ငန်းလိုင်စင်ပယ်ဖျက်မှု ပြုလုပ်ခဲ့ပါတယ်။
