ရွှေဖီမြေ၊ ဖေဖော်ဝါရီ ၇ ရက်
နိုင်ငံရေးပြဿနာကို စစ်ရေးနည်းနဲ့ မဖြေရှင်းဘဲ နိုင်ငံရေးနည်းလမ်းနဲ့ ဖြေရှင်းဖို့ သျှမ်းပြည် ပြန်လည်ထူထောင်ရေးကောင်စီ- RCSS ဥက္ကဌ ဗိုလ်ချုပ်ကြီး ယွက်ဆစ်က ထပ်ပြောပါတယ်။
ဒီနေ့ ဖေဖော်ဝါရီ ၇ ရက်မှာ ကျရောက်တဲ့ ၇၈ နှစ်မြောက် ရှမ်းအမျိုးသားနေ့သို့ ပေးပို့တဲ့ သဝဏ်လွှာမှာ ဗိုလ်ချုပ်ကြီး ယွက်ဆစ်က အခုလို ထည့်သွင်းပြောကြားခဲ့တာ ဖြစ်ပါတယ်။
မြန်မာပြည်တွင်းစစ် နှစ်ပေါင်း ၇၇ နှစ်ကြာရှည်ရတာဟာ အချင်းချင်းကြား ရိုးသားမှု မရှိတာ၊ ပင်လုံ စာချုပ်အတိုင်း မဆောင်ရွက်နိုင်တာ၊ ယုံကြည်မှု မတည်ဆောက်နိုင်တာနဲ့ တွေ့ဆုံဆွေးနွေးတဲ့နည်းလမ်းနဲ့ မဖြေရှင်းနိုင်တာတွေကြောင့် ဖြစ်တယ်လို့ ဗိုလ်ချုပ်ကြီး ယွက်ဆစ်က ပြောပါတယ်။
အဖွဲ့အစည်းတိုင်းဟာ နိုင်ငံရေးဆွေးနွေးပွဲကို လွတ်လွတ်လပ်လပ် ကျင်းပနိုင်ရမှာဖြစ်ပြီး RCSS အနေနဲ့ ပြဿနာတွေကို တွေ့ဆုံဆွေးနွေးတဲ့ နည်းလမ်းနဲ့ ဖြေရှင်းဖို့ ပေါ်လစီချမှတ်ထားတာကြောင့် အဖွဲ့အစည်းတိုင်းနဲ့ ဆွေးနွေးဖို့ တံခါးဖွင့်ထားတယ်လို့ ဆိုပါတယ်။
စစ်ရေးနည်းလမ်းနဲ့ ဖြေရှင်းရင် လူထုတွေ ဒုက္ခရောက်ကြရတယ်လို့ ဗိုလ်ချုပ်ကြီးယွက်ဆစ်က ထည့်သွင်းပြောကြားခဲ့ပါတယ်။
လာမယ့် အနာဂတ်မှာ ရှမ်းပြည်ဟာ ရှမ်းပြည်တိုင်းရင်းသားတွေ စုပေါင်းတည်ထောင်တဲ့ ပြည်ထောင်စုရှမ်းပြည် ဖြစ်ရမှာဖြစ်ပြီး မြန်မာနိုင်ငံကလည်း ကမ္ဘာ့နိုင်ငံရေး အခင်းအကျင်းနဲ့ ကိုက်ညီတဲ့ ဖယ်ဒရယ် ဒီမိုကရေစီ ပြည်ထောင်စု ဖြစ်ရမယ်လို့ ဗိုလ်ချုပ်ကြီး ယွက်ဆစ်က ထည့်သွင်းပြောကြားခဲ့ပါတယ်။
ဒီနေ့မှာ ကျရောက်တဲ့ ရှမ်းအမျိုးသားနေ့မှာ အမျိုးသား ညီညွတ်ရေးအစိုးရ- NUG လည်း သဝဏ်လွှာ ပေးပို့ထားတာ တွေ့ရပါတယ်။
RCSS ဟာ တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးစာချုပ်- NCA ရေးထိုးထားတဲ့ တိုင်းရင်းသား လက်နက်ကိုင်တပ်ဖြစ်ပြီး စစ်တပ် အာဏာသိမ်းပြီးနောက်ပိုင်းမှာလည်း တွေ့ဆုံဆွေးနွေးရေးလမ်းကြောင်းကို ကိုင်စွဲပြီး စစ်ကောင်စီနဲ့ မကြာခဏ တွေ့ဆုံတဲ့အဖွဲ့ ဖြစ်ပါတယ်။
