ရွှေဖီမြေ၊ ဖေဖော်ဝါရီ ၆ ရက်၊ ရေး
မွန်ပြည်နယ် သံဖြူဇရပ်-ရေးလမ်းပိုင်းပေါ်က ကွမ်းဒူးနဲ့ နှင်းစုံရွာကြားတံတားမှာ တပ်စွဲထားတဲ့ စစ်ကောင်စီတပ်သားကို မွန်ပြည်သစ်ပါတီ- AD က စီးနင်းတိုက်ခိုက်ခဲ့ရာ စစ်သား ၅ ဦး သေဆုံးခဲ့ပါတယ်။
မနေ့မနက် ၆ နာရီက စစ်တပ်ရဲ့ဂိတ်ကို စစ်အာဏာရှင် တိုက်ဖျက်ရေးအဖွဲ့ဖြစ်တဲ့ New Mon State Party- AD က အနီးကပ် ဝင်ရောက် စီးနင်းတိုက်ခိုက်ခဲ့တယ်လို့ NMSP-AD က မနေ့ ဖေဖော်ဝါရီ ၅ ရက်မှာ ထုတ်ပြန်ထားပါတယ်။
တိုက်ပွဲ ဖြစ်ပွားချိန်ဟာ ၁ နာရီ ကြာမြင့်ပြီး စစ်တပ်ဘက်မှ ဒဏ်ရာရသူ များကာ NMSP-AD ဘက်မှ ရဲဘော်တစ်ဦးလည်း မစိုးရိမ်ရတဲ့ဒဏ်ရာ ရရှိခဲ့ပါတယ်။
အထိနာသွားတဲ့ စစ်တပ်က အာရုတောင် အခြေစိုက် စစ်ကောင်စီ ခမရ ၃၄၃ နဲ့ ၅၈၇ တပ်ရင်းကနေ လက်နက်ကြီးနဲ့ ရမ်းသမ်းပစ်ခတ်ခဲ့တယ်လို့ ဖော်ပြထားပါတယ်။
ပြီးခဲ့တဲ့ ဇန်နဝါရီ ၁၃ ရက်က စစ်တပ် ခြေကုပ် ယူထားတဲ့ ကျိုက်မရောမြို့နယ် ကဒါကျေးရွာ ရဲစခန်းနဲ့ တောင်ကလေးရွာ ရဲစခန်းကို မွန်ပြည်သစ်ပါတီ- AD ရဲ့ ဒရုန်းတပ်ဖွဲ့က ဒရုန်းနဲ့ တိုက်ခိုက်ခဲ့တာကြောင့် စစ်တပ်ဘက်မှ ၆ ဦး သေဆုံးကာ ၅ ဦး ထိခိုက်ဒဏ်ရာ ရခဲ့ပါတယ်။
