အင်းငယ်၊ ဖေဖော်ဝါရီ ၅ ရက်၊ အင်းလေး
ညောင်ရွှေမြို့နယ် အင်းလေးဒေသ ရေပူဘုရားတောင်ကျေးရွာအုပ်စုကို ဒီနေ့ ဖေဖော်ဝါရီ ၅ ရက် မနက်ပိုင်းမှာ လက်နက်ကြီးနဲ့ ၁၅ ကြိမ် ပစ်ခတ်ခဲ့တယ်လို့ ဒေသတွင်း သတင်းအရင်းအမြစ်တွေက ရွှေဖီမြေကို ပြောပါတယ်။
ရေပူဘုရားတောင်ကျေးရွာအုပ်စု ဘုရားတောင်လွယ်နွဲ့ရွာကို မနက် ၇ နာရီ ၁၅ မိနစ်ဝန်းကျင်မှာ စစ်တပ်က လက်နက်ကြီးပစ်ခတ်ခဲ့ပြီး အသက် ၇၄ နှစ်အရွယ် ဦးပြားဆိုသူ သေဆုံးခဲ့တယ်လို့ ဆိုပါတယ်။
ဒါ့အပြင် ၎င်းရဲ့ သမီးဖြစ်တဲ့ အသက် ၃၀ ဝန်းကျင်နဲ့ ၅၀ ဝန်းကျင်အရွယ်ရှိ အမျိုးသမီး ၂ ဦးလည်း ပြင်းထန်ဒဏ်ရာ ရရှိထားပြီး ကုသမှု ခံယူနေရတယ်လို့ နီးစပ်သူတစ်ဦးက ပြောပါတယ်။
“ဖအေကတော့ ပွဲချင်းပြီးပဲ။ သမီးတွေလည်း စိုးရိမ်ရတယ်။ တိုက်ပွဲ မရှိပါဘူး။ အရပ်သားရှိတဲ့နေရာကို ရည်ရွယ်ချက်ရှိရှိ ပစ်တာပါ။ စစ်ရှောင်စခန်းမှာလည်း ထိထားတာတွေ ရှိသေးတယ်”
အလားတူ ဒီနေ့ ၈ နာရီခွဲခန့်ကလည်း ကျေးရွာအတွင်းရှိ စစ်ရှောင်စခန်းကုန်းကို လက်နက်ကြီးနဲ့ ပစ်ခတ်ခဲ့ရာ အသက် ၄၄ နှစ်အရွယ် ဦးဖိုးဝဆိုသူ ပွဲချင်းပြီး သေဆုံးကာ ၄ ဦး ဒဏ်ရာ ထပ်ရခဲ့တယ်လို့ ဆိုပါတယ်။
ဒေသတွင်း စစ်ဘေးရှောင်အရေး ကူညီဆောင်ရွက်ပေးနေသူတစ်ဦးက “ဖိုးဝက လွိုင်ကော် မှုံပြာကနေ စစ်ရှောင်လာတာ။ ဒဏ်ရာရတာတွေက အမျိုးသမီးတစ်ယောက်ပဲ ပါတယ်။ အကုန်လုံး ၅၀၊ ၆၀ အသက်အရွယ်တွေပါပဲ။ နှလုံးရပ်ပြီး ပွဲချင်းပြီး မဖြစ်တာ တော်တော်ကံကောင်းတယ် ပြောရမယ်” လို့ ပြောပါတယ်။
ဇန်နဝါရီ ၁၇ ရက်ကလည်း ဘုရားတောင် ဘုန်းကြီးကျောင်းအနီးက စစ်ဘေးရှောင်စခန်းကို စစ်တပ်က လက်နက်ကြီး ပစ်ခတ်ခဲ့ပါသေးတယ်။
အဲဒီ ပစ်ခတ်မှုမှာလည်း အသက် ၆ နှစ်အရွယ် ကလေးတစ်ဦးအပါအဝင် အရပ်သား ၃ ဦး သေဆုံးခဲ့ပြီး ၁၄ ဦး ပြင်းထန်ဒဏ်ရာ ရရှိခဲ့တယ်လို့ နီးစပ်တဲ့ စစ်ရေး သတင်းအရင်းအမြစ်တွေဆီက သိရပါတယ်
