ယာရူစိင်း၊ ဖေဖော်ဝါရီ ၃ ရက်၊ မိုးကုတ်
တအာင်းတပ်မတော်- PSLF/TNLA ထိန်းချုပ်ထားတဲ့ မိုးကုတ်မြို့မှာ ဝါယာကြိုး ရှော့ဖြစ်ပြီး ဆိုင်ခန်းတစ်ခု မီးလောင်တာအပြင် ဒေသခံနှစ်ဦးလည်း ဒဏ်ရာ ရခဲ့ပါတယ်။
မိုးကုတ်မြို့ အောင်နန်းရပ်ကွက်က ရွှေစင်ဆိုင်မှာ မနေ့ ဖေဖော်ဝါရီ ၂ ရက် ညနေ ၅ နာရီဝန်းကျင်က မီးစက် နှိုးထားရာကနေ ဝါယာကြိုး ရှော့ဖြစ်ပြီး မီးကူးစက် လောင်ကျွမ်းခဲ့တာလို့ ဖြစ်စဉ်သိရှိသူ အမျိုးသားတစ်ဦးက ရွှေဖီမြေကို ပြောပါတယ်။
“တန်ဖိုးကြီး ပစ္စည်းတွေတော့ အများကြီး ပါသွားတယ်။ မီးကူးတဲ့အချိန်မှာ သူလည်း သတိမထားမိလို့ နေမှာပေါ့။ ကျနော် အဲနေရာရောက်တဲ့အချိန်မှာတောင် မီးက အတော်လေး ပြင်းနေပြီ”
မီးလောင်မှုမှာ ဒေသခံအမျိုးသား ၂ ဦးဖြစ်တဲ့ ကျော်မောင်ဦးနဲ့ ဦးဇော်မင်းထွန်းတို့ ထိခိုက်ဒဏ်ရာ ရရှိခဲ့တယ်လို့ ၎င်းက ဆက်ပြောပါတယ်။
မီးလောင်ဆုံးရှုံးသွားတဲ့ ပစ္စည်းတန်ဖိုးဟာ သိန်း ၁၀၀ ကျော် ရှိတယ်လို့လည်း သိရပါတယ်။
မီးကိုတော့ PSLF/TNLA ရဲ့ မီးသတ်တပ်ဖွဲ့ရဲ့ မီးသတ်ကား ၂ စီးနဲ့အတူ ဒေသခံလူထုတွေက ဝိုင်းဝန်းငြိမ်းသတ်ပေးခဲ့တယ်လို့ PSLF/TNLA ရဲ့ သတင်းနဲ့ ပြန်ကြားရေးဌာနက ထုတ်ပြန်ထားပါတယ်။
