ခိုင်လေး၊ ဖေဖော်ဝါရီ ၃ ရက်၊ မင်းလှ
ပဲခူးတိုင်း သာယာဝတီခရိုင် မင်းလှမြို့နယ်မှာ စစ်ကောင်စီတပ်ရဲ့ တပ်သား ၃ ဦးထွက်ပြေးတာကို လိုက်ရှာချိန် သာယာဝတီခရိုင် တပ်ရင်း ၃၈၀၂ တပ်ခွဲ ၃ နဲ့ ထိတွေ့မှုဖြစ်ပွားခဲ့ပြီး ၂ ဦး သေဆုံးကာ ၅ ဦး ဒဏ်ရာရခဲ့တယ်လို့ သာယာဝတီခရိုင် တပ်ရင်း ၃၈၀၂ မှ တာဝန်ရှိသူတစ်ဦးက ရွှေဖီမြေကိုပြောပါတယ်။
ဖေဖော်ဝါရီ ၁ ရက်က စမ်းဘုတ်အုပ်စု ကျွန်းကုန်းရွာ ချောင်းမကြီးတံတားအနီးမှာ အင်အား ၃၀ ခန့်ပါတဲ့ စစ်ကောင်စီ စစ်ကြောင်းနဲ့ သာယာဝတီခရိုင် တပ်ရင်း ၃၈၀၂ တပ်ခွဲ ၃ တို့ ထိတွေ့တိုက်ပွဲ ဖြစ်ပွားခဲ့တာလို့ ဆိုပါတယ်။
“မနက်ပိုင်း ပြေးတာလို့ ပြောပါတယ်။ ဆိုင်းဘုတ်ဂိတ်က စစ်သား ၃ ကောင် ပျောက်သွားလို့ သူတို့ကလည်း လိုက်ရှာနေတာ။ တိုက်ပွဲက ၁၀ မိနစ်လောက် ကြာတယ်။ ကျနော်တို့ဘက်က ရဲဘော် ၂ ယောက် ဒဏ်ရာ ရတယ်။ တစ်ယောက်က ခေါင်း၊ တစ်ယောက်က ခြေထောက်ကိုကျည် ရှပ်မှန်သွားတယ်”
ထိတွေ့တိုက်ပွဲအတွင်း အပြန်အလှန် ပစ်ခတ်ခတ်မှု ဖြစ်ပွားခဲ့ပြီး စစ်တပ်ဘက်မှ အထိနာတဲ့အတွက် ပြန်လည် ဆုတ်ခွာသွားခဲ့ပြီး သာယာဝတီခရိုင် တပ်ရင်း ၃၈၀၂ တပ်ခွဲ ၃ က ရဲဘော် ၂ ဦး မစိုးရိမ်ရတဲ့ဒဏ်ရာ ရရှိခဲ့တာ ဖြစ်ပါတယ်။
ထိတွေ့တိုက်ပွဲ ဆက်လက် ဖြစ်လာနိုင်တာကြောင့် ဒေသခံတွေအနေနဲ့ စစ်ကောင်စီတပ်ဖွဲ့ဝင်ရဲ့ အနီးအနားမှာ သွားလာနေထိုင်ခြင်း မပြုလုပ်ကြဖို့ သာယာဝတီခရိုင် တပ်ရင်း ၃၈၀၂ တပ်ခွဲ ၃ က ထုတ်ပြန်ထားပါတယ်။
သာယာဝတီခရိုင် တပ်ရင်း ၃၈၀၂ တပ်ခွဲ ၃ ဟာ ပြီးခဲ့တဲ့ ဇန်နဝါရီ ၂၁ ရက်ကလည်း မင်းလှမြို့နယ် ရိုးမပေါ်ကို စစ်ကြောင်း ထိုးလာတဲ့ စစ်တပ်ကို ကျွန်းကုန်းရွာ ချောင်းမကြီးတံတားအနီးမှာ မိုင်းဆွဲတိုက်ခိုက်ခဲ့လို့ စစ်ကောင်စီတပ်သား ၁ ဦး သေဆုံးပြီး ၂ ဦးပြင်းထန်ဒဏ်ရာ ရရှိခဲ့ပါတယ်။
