မိုင်းရူပ၊ ဖေဖော်ဝါရီ ၃ ရက်၊ ဖယ်ခုံ
စစ်ကောင်စီတပ်နဲ့ ကရင်နီတော်လှန်ရေးအင်အားစုတွေအကြား တိုက်ပွဲ ဖြစ်နေတဲ့ ရှမ်းတောင်-ကရင်နီနယ်စပ် ဖယ်ခုံမြို့နယ် မိုးဗြဲမြို့မှာ စစ်တပ်က လက်နက်ကြီး၊ ဒရုန်းနဲ့ လေကြောင်း တိုက်ခိုက်မှု ဆက်တိုက်ပြုလုပ်နေတယ်လို့ ရွှေဖီမြေက စုံစမ်းသိရှိရပါတယ်။
ကရင်နီ တော်လှန်ရေးအင်အားစုတွေ ထိန်းချုပ်ထားတဲ့ မိုးဗြဲမြို့ကို စစ်တပ်က ပြန်ရဖို့ ထိုးစစ်ဆင် တိုက်ခိုက်လာတာကြောင့် တိုက်ပွဲ ပြန်လည် ဖြစ်ပွားနေတာ ဖြစ်ပါတယ်။
လက်ရှိမှာ မိုးဗြဲမြို့ကို ကရင်နီ တော်လှန်ရေးအင်အားစုတွေ ထိန်းချုပ်ထားတယ်လို့ ကရင်နီအမျိုးသားများ ကာကွယ်ရေးတပ်- KNDF ရဲ့ ပြန်ကြားရေးတာဝန်ခံက ရွှေဖီမြေကို ပြောပါတယ်။
“မိုးဗြဲမှာက တိုက်ပွဲကြီးကြီးမားမားတော့ မရှိပေမဲ့ စစ်ကောင်စီဖက်က လက်နက်ကြီးနဲ့ ပစ်ခတ်တာတွေ၊ ဒရုန်းနဲ့ ဗုံးကြဲတာတွေ၊ လေယာဥ်နဲ့ ဗုံးကြဲတာတွေ ဒီရက်ပိုင်းမှာ လုပ်တာမျိုး ရှိပါတယ်”
မြေပြင်အခြေအနေ သိရှိသူတစ်ဦးကလည်း မိုးဗြဲမြို့မှာ ဒီရက်ပိုင်းအတွင်း စစ်တပ်က လက်နက်ကြီးနဲ့ လေကြောင်း တိုက်ခိုက်မှုတွေ ဆက်တိုက် ပြုလုပ်နေတယ်လို့ ဆိုပါတယ်။
၎င်းက “မနေ့ နေ့လယ် ၃ နာရီဝန်းကျင်မှာ ၁ ခါ လာကြဲတယ်။ ဒီမနက်အစောပိုင်းလည်း ၁ ခါ လာကြဲတယ်။ လက်နက်ကြီးနဲ့လည်း ထုတယ်” လို့ ပြောပါတယ်။
ပြီးခဲ့တဲ့ ဇန်နဝါရီ ၁ လအတွင်း မိုးဗြဲမှာ စစ်တပ်က ထိုးစစ်ဆင် တိုက်ခိုက်လာတာကြောင့် စစ်ကောင်စီတပ်နဲ့ ကရင်နီတော်လှန်ရေး အင်အားစုတွေအကြား ၁ လကြာတဲ့အထိ တိုက်ပွဲ အပြင်းအထန် ဖြစ်ပွားခဲ့တယ်လို့ KNDF က ထုတ်ပြန်ထားပါတယ်။
မိုးဗြဲမြို့ရဲ့ နေရာအများစုကို ကရင်နီတော်လှန်ရေး အင်အားစုတွေက ထိန်းချုပ်နိုင်ခဲ့ပေမဲ့ မိုးဗြဲမြို့အနီးမှာတော့ စစ်ကောင်စီရဲ့ ခြေမြန်တပ်ရင်း (ခမရ ၄၂၂) ကျန်ရှိနေတာ ဖြစ်ပါတယ်။
စစ်တပ်ဘက်ကတော့ မိုးဗြဲ တိုက်ပွဲနဲ့ ပတ်သက်ပြီး တစ်စုံတစ်ရာ သတင်းထုတ်ပြန်ထားတာ မရှိသေးပါဘူး။
