မိုင်းရူပ၊ ဖေဖော်ဝါရီ ၃ ရက်၊ သပိတ်ကျင်း
မန္တလေးတိုင်း သပိတ်ကျင်းမြို့နယ် တွင်းငယ်ရွာမှာ စစ်ကောင်စီတပ်က ထိုးစစ်ဆင် တိုက်ခိုက်လာတာကြောင့် တအာင်းတပ်မတော်- TNLA ပူးပေါင်းတပ်တို့အကြား တိုက်ပွဲ ပြန်ဖြစ်နေတယ်လို့ ရွှေဖီမြေက စုံစမ်းသိရှိရပါတယ်။
မနေ့ ဖေဖော်ဝါရီ ၂ ရက် ည ၆ နာရီ ၂၅ မိနစ်မှာ TNLA နဲ့ ပူးပေါင်းတပ် တည်ရှိရာကို စစ်တပ်က ထိုးစစ်ဆင် တိုက်ခိုက်လာတာကြောင့် ၁ နာရီကျော်ကြာ တိုက်ပွဲ ဖြစ်ပွားခဲ့တယ်လို့ ရှေ့တန်း စစ်မြေပြင်မှာ ရှိနေသူတစ်ဦးက ရွှေဖီမြေကို ပြောပါတယ်။
“၁၃ တပ်အနီးမှာ TNLA က ထိုင်ထားတယ်။ တွင်းငယ်ရွာအနီးအထိ ကျနော်တို့အဖွဲ့တွေ ရှိတယ်။ စစ်ကောင်စီက ဒရုန်းနဲ့ ကြဲတာ၊ ထိုးစစ် လုပ်လာရင် တိုက်ပွဲ ဖြစ်တာရှိတယ်။ မနေ့ စစ်ကောင်စီတပ်ဖွဲ့တွေက ထိုးစစ် လုပ်လာလို့ တိုက်ပွဲဖြစ်တာ”
လက်ရှိမှာ တွင်းငယ်ရွာရှိ စစ်တပ်နဲ့ တွင်းငယ်အနီးရှိ စစ်ကောင်စီရဲ့ တန်းမြင့်လေ့ကျင့်ရေးကျောင်း အမှတ်(၁၃)တပ်ကို ပြည်သူ့လွတ်မြောက်ရေး တပ်မတော်- PLA နဲ့ TNLA က ဝိုင်းရံပိတ်ဆို့ထားတယ်လို့ သူက ဆက်ပြောပါတယ်။
တွင်းငယ်ရွာကို ပြီးခဲ့တဲ့ ၂၀၂၄ ခုနှစ် ဩဂုတ်လကတည်းက TNLA နဲ့ ပူးပေါင်းတပ်က တိုက်ခိုက်သိမ်းပိုက်ခဲ့ရာ ၄ လနီးပါးအကြာမှာတော့ ပြန်လည် လက်လွှတ်ခဲ့ရတာ ဖြစ်ပါတယ်။
စစ်တပ်ဟာ တွင်းငယ်ရွာကို ထိန်းချုပ်ပြီးနောက်ပိုင်း နေအိမ်တွေကို ဆက်တိုက် မီးရှို့တာတွေ ပြုလုပ်နေပြီး တွင်းငယ်ရွာထဲ စစ်ကောင်စီတပ်ဖွဲ့ ရှိနေတာကြောင့် မီးရှို့ခံခဲ့ရတဲ့ နေအိမ် အရေအတွက်ကိုတော့ မသိရသေးပါဘူး။
သပိတ်ကျင်းမြို့ကို ပြီးခဲ့တဲ့ ၂၀၂၄ ဩဂုတ် ၂၅ ရက်မှာ တော်လှန်ရေး အင်အားစုတွေက တိုက်ခိုက်သိမ်းပိုက်ထားနိုင်ပေမဲ့ စစ်ကောင်စီရဲ့ တကက ၁၃၊ ၇ မိုင်နဲ့ တွင်းငယ်ရွာမှာ စစ်တပ်စခန်းတွေ ကျန်ရှိနေတာ ဖြစ်ပါတယ်။
