လွေးထွေး၊ ဖေဖော်ဝါရီ ၂ ရက်၊ ဂွ
စစ်ကောင်စီတပ်ရဲ့ ဆေးဝါး ဖြတ်ေတာက်တာကို ခံနေရတဲ့ အာရက္ခတပ်တော်- AA ထိန်းချုပ်ထားတဲ့ ရခိုင်ပြည်နယ် ဂွမြို့နယ်က ကျေးရွာ ၁၂ ရွာခန့်မှာရှိတဲ့ ကလေးငယ်အပါအဝင် ဒေသခံ ၃ ထောင်ကျော်ဟာ အရေပြား ကူးစက်ရောဂါ ကြုံနေရကြောင်း ဂွမြို့နယ် စစ်ရှောင်ကူညီရေး ပူးပေါင်းအဖွဲ့ရဲ့ ပြန်ကြားရေးတာဝန်ခံ ကိုနိုင်အောင်လင်းက ရွှေဖီမြေကို ပြောပါတယ်။
အဲဒီအရေပြားရောဂါဟာ ပြီးခဲ့တဲ့ ဇန်နဝါရီလကစပြီး အဖြစ်များခဲ့တာ ဖြစ်ပြီးတော့ ၁၀ နှစ်အောက် ကလေးတွေမှာ ပိုပြီး ပြင်းပြင်းထန်ထန် ကူးစက်နေတယ်လို့ ဆိုပါတယ်။
၎င်းဒေသဟာ AA ထိန်းချုပ်ဒေသ ဖြစ်နေတာကြောင့် စစ်တပ်က ဆေးဝါးသယ်ဆောင်ခွင့်၊ စားနပ်ရိက္ခာ သယ်ဆောင်ခွင့် ပိတ်ထားတဲ့အတွက် လူထုတွေက ဆေးဝါး ရှားပါးတဲ့ပြဿနာနဲ့ စားသောက်ဖို့ အခက်အခဲ ဖြစ်နေကြတယ်လို့ ဆိုပါတယ်။
ကိုနိုင်အောင်လင်းက “အဲဒီ ကျေးရွာတွေက အသက် ၁၀ နှစ်အောက် ကလေးတွေ ပိုအဖြစ်များတယ်။ ကိုယ်ခံအား မကောင်းတာကြောင့်လည်းဖြစ်မယ်။ အစာတွေ၊ ဆေးဝါးတွေ ဖြတ်တောက်ခံထားရတော့ အစာအာဟာရ ချို့တဲ့ကြတာကြောင့်လဲ ပါမယ်။ ကျေးရွာက လူထုတွေဆီ ကူးစက်တဲ့အပြင် ဒုက္ခသည်စခန်းက လူတွေဆီကိုလည်း စကူးလာပြီ။ အဓိကတော့ ကုသဖို့ ဆေး မရှိလို့ဖြစ်တယ်” လို့ ရွှေဖီမြေကို ပြောပါတယ်။
လက်ရှိအချိန်ထိ အရေပြားရောဂါ ကူးစက်ခံနေကြရသူတွေကို ဂွမြို့နယ် စစ်ရှောင်ကူညီရေးပူးပေါင်းအဖွဲ့က ကူညီခဲ့ပေမဲ့ ငွေကြေး၊ ဆေးဝါးနဲ့ အစားအသောက် အကူအညီ ဆက်လက် လိုအပ်နေတာကြောင့် ပြည်တွင်းပြည်ပ နေရာဒေသ အသီးသီးက အကူအညီတွေ လိုအပ်နေကြောင်း ကိုနိုင်အောင်လင်းက ဆိုပါတယ်။
ဂွမြို့ကို ပြီးခဲ့တဲ့ ၂၀၂၄ ခုနှစ် ဒီဇင်ဘာ ၂၉ ရက်မှာ AA က တိုက်ခိုက်သိမ်းပိုက်ခဲ့တာပဲ ဖြစ်ပါတယ်။
