ရွှေဖီမြေ၊ သြဂုတ် ၂၅ ရက်၊ သံတွဲ
အာရက္ခတပ်တော်- AA ထိန်းချုပ်ထားတဲ့ ရခိုင်ပြည်နယ် သံတွဲနဲ့ ဂွမြို့နယ်ထဲ စစ်ကောင်စီတပ်က ဗုံးအလုံး ၁၀၀ ခန့် ကြဲချတိုက်ခိုက်ခဲ့ရာ အရပ်သား ၁ ဦး သေဆုံးပြီး ၂၀ ကျော် ဒဏ်ရာ ရခဲ့တယ်လို့ AA က သတင်းထုတ်ပြန်လာပါတယ်။
ပြီးခဲ့တဲ့ သြဂုတ် ၂၁ ရက် ညသန်းခေါင်ယံအချိန်မှာ သံတွဲမြို့နယ် ငပလီမြို့ထဲက စစ်တပ်စခန်းဟောင်းရှိတဲ့ ခြေမြန်တပ်ရင်း ၅၆၆ နဲ့ ခြေလျင်တပ်ရင်း ၅၅ တပ်ထဲအပြင် လူထုတွေ နေထိုင်တဲ့နေရာတွေကို ဂျက်လေယာဉ် ၈ စီး၊ Y-8 တစ်စီးနဲ့ Y-12 တစ်စီး အသုံးပြုပြီး ဗုံးကြဲတိုက်ခိုက်ခဲ့ပါတယ်။
တိုက်ခိုက်မှုအတွင်း ငပလီမှာ စစ်ဘေးရှောင်သူ ၁ ဦး သေဆုံးပြီး ၇ ဦး ထိခိုက်ဒဏ်ရာ ရခဲ့တယ်လို့ AA ရဲ့ ထုတ်ပြန်ချက်ထဲ ဖော်ပြထားပါတယ်။
ဒါ့အပြင် သြဂုတ် ၂၁ ရက်တည်းမှာတင် ဂွမြို့နယ် ညောင်ချောင်းရွာထဲ ဂျက်တိုက်လေယာဉ်တစ်စီးနဲ့ ဗုံး ၂ ကြိမ် ကြဲချတိုက်ခိုက်ခဲ့ရာ အရပ်သား ၈ ဦး ထိမှန်ဒဏ်ရာ ရခဲ့ပါတယ်။
စစ်တပ်ဟာ ရခိုင်ဒေသအတွင်း စစ်ရေးနဲ့ မသက်ဆိုင်တဲ့ နေရာတွေကို လေယာဉ်နဲ့ ဗုံးကြဲတိုက်ခိုက်တာတွေ ဆက်တိုက် ပြုလုပ်နေပြီး အရပ်သား ထိခိုက်သေဆုံးမှုတွေ တစ်ရက်ပြီးတစ်ရက် မြှင့်တက်လာတယ်လို့ AA က ဆိုပါတယ်။
ပြီးခဲ့တဲ့ သြဂုတ် ၁၆ ရက်မှာလည်း သံတွဲမြို့ပေါ် စစ်တပ်ဘက်က ဗုံးကြဲတိုက်ခိုက်လို့ အရပ်သား ၂ ဦး သေဆုံးပြီး ၆ ဦး ထိခိုက်ဒဏ်ရာ ရခဲ့ပါတယ်။
ရခိုင်ဒေသအတွင်း နေထိုင်တဲ့ လူထုတွေအနေနဲ့ စစ်တပ်ရဲ့ ဗုံးကြဲတိုက်ခိုက်မှုနဲ့ ရေကြောင်းရန်တွေကို အရင်ကထက် သတိထားဖို့ AA က တိုက်တွန်းထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
