နမ့်ပေါင်မှာ ရေကြီးလို့ စပါးခင်းတွေ ပျက်စီးပြီး နေအိမ်ထဲအထိ ရေဝင်

ပပ၊ ဩဂုတ် ၄ ရက်၊ လားရှိုး

‎ရှမ်းမြောက် လားရှိုးမြို့နယ် နမ့်ပေါင်မှာ မိုးကြီးတာကြောင့် ချောင်းရေတက်ပြီး လယ်ကွက်နဲ့နေအိမ်တွေထဲ ရေဝင်ခဲ့ကြောင်း ရွာခံအမျိုးသမီးတစ်ဦးရဲ့ပြောပြချက်အရ သိရပါတယ်။

‎ဒီနေ့ ဩဂုတ် ၄ ရက် မနက် ၈ နာရီ ဝန်းကျင်မှာ လားရှိုးမြို့နယ် နမ့်ပေါင်ရွာအဝင်ရှိ နမ့်မောဟင်ချောင်းဟာ မိုးကြီးလွန်းတာကြောင့် ရေတက်ပြီး နေအိမ်တွေထဲထိရေဝင်တဲ့အပြင် စပါးခင်းတွေကိုပါ ရေတိုက်စားခဲ့ပါတယ်။

‎ရွာခံ အမျိုးသမီးက “အခုတော့ ရေနဲနဲတော့ပြန်ကျပြီ။ လမ်းမှာသွားရတာအဆင်ပြေပြီ။ မနက်ကဆို သွားလာလို့တောင်မရဘူး။ ဟိုအပေါ်ဘက်မှာဆို စပါးခင်းတွေ အကုန်ပျက်ကုန်ပြီ” လို့ ပြောပါတယ်။

‎နမ့်ပေါင်မှာ မိုးတွင်းကာလ ရေကြီးတာဖြစ်လေ့ရှိပေမဲ့ အခုလို ရေလျှံတာမရှိခဲ့ဖူးကြောင်း အထက်ပါအမျိုးသမီးက ဆိုပါတယ်။

‎ပြီးခဲ့တဲ့ ဇူလိုင် တတိယအပတ်ကလည်း လားရှိုးမြို့ ရပ်ကွက် ၁၂၊ ရပ်ကွက် ၇ နဲ့ လားရှိုးဈေးကြီးထဲ ရေကြီးတာတွေ ဖြစ်ပွားခဲ့ပါတယ်။

‎အလားတူ မိုးတွင်းကာလမှာ မိုးကြီးတာကြောင့် ရှမ်းမြောက်က မြို့နယ်တွေအပြင် ရှမ်းအရှေ့နဲ့ ရှမ်းတောင်မှာလည်း ရေကြီးရေလျှံတာတွေ ဖြစ်ပွါးခဲ့ပါတယ်။

~ ~ ~

ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။

Shwe Phee Myay YouTube

Shwe Phee Myay Telegram