ရွှေဖီမြေ၊ ဇူလိုင် ၂၂ ရက်၊ ပုလဲ
စစ်ကိုင်းတိုင်း ပုလဲမြို့နယ်ထဲက စာသင်ကျောင်းတစ်ခုမှာ ကလေးငယ်တွေ ယားနာရောဂါဖြစ်ပွားနေပြီး အရေးပေါ် ဆေးဝါးအကူအညီလိုအပ်နေတယ်လို့ အဲဒီကျေးရွာမှာ တာဝန်ကျတဲ့ ကျန်းမာရေးဝန်ထမ်းတစ်ဦးက ရွှေဖီမြေကို ပြောပါတယ်။
အဲဒီစာသင်ကျောင်းကို အမျိုးသားညီညွတ်ရေးအစိုးရ (NUG) က ဖွင့်လှစ်ထားတဲ့ ကျောင်းဖြစ်ပြီး ကျေးရွာ ၄ ရွာက ကလေး ၄၀၀ ကျော်ကို စာသင်ကြားပေးနေတဲ့ စာသင်ကျောင်းဖြစ်တယ်လို့ ဆိုပါတယ်။
လက်ရှိမှာ ယားနာပေါက်နေတဲ့ ကလေး ၂၀ ဝန်းကျင်ရှိပြီး တစ်ဦးနဲ့တစ်ဦး ကူးစက်နေတာကြောင့် အရေးပေါ် ဆေးဝါးအကူအညီလိုအပ်နေတယ်လို့ ကျန်းမာရေးဝန်ထမ်းတစ်ဦးက ရွှေဖီမြေကို ပြောပါတယ်။
“မိုးတွင်းကာလဆိုတော့ အနာစက်လေးတွေပေါက်ကျတယ်ဗျ။ တစ်ယောက်နဲ့တစ်ယောက် ကူးစက်နေကြတာဆိုတော့ ပွားပွားနေကြတာ။ အရင်နှစ်တွေမှာတော့ ကွင်းဆင်းဆေးကုပေးတယ်။ ကြာလာတာနဲ့အမျှ ကြပ်တည်းလာတဲ့ အခြေအနေတွေကြောင့် နားထားရတယ်” လို့ ဆိုပါတယ်။
ဒီစာသင်ကျောင်းနဲ့ စစ်ကောင်စီလက်အောက်ခံ ပျူစောထီးတွေနေထိုင်တဲ့ ကျေးရွာတွေကြားမှာ တည်ရှိနေတာဖြစ်ပြီး ကလေးငယ်တွေအတွက် သွားလာရေးအခက်အခဲရှိနေတာကြောင့် ဝိုင်းဝန်းကူညီကြဖို့ ၎င်းက တောင်းဆိုထားပါတယ်။
စစ်ကိုင်းတိုင်းနဲ့ မကွေးတိုင်းအပါအဝင် ပြည်သူ့ကာကွယ်ရေးတပ် (PDF) ထိန်းချုပ်ထားတဲ့ နေရာတွေမှာ NUG က ကြားကာလစာသင်ကျောင်းတွေ ဖွင့်လှစ်ပေးထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
