ဆုမွန်၊ ဇူလိုင် ၂၁ ရက်၊ နမ့်ခမ်း
တရုတ်ဘက်က ရေကာတာဖွင့်ချခဲ့ချိန်ကစပြီး တအာင်းတပ် – PSLF/TNLA ထိန်းချုပ်ထားတဲ့ နမ့်ခမ်းမြို့ ရွှေလီမြစ်ကမ်းဘေးမှာရှိတဲ့ ဒေသခံတွေဟာ လက်ရှိအချိန်ထိ ရေလွှမ်းမိုးခြင်းဒဏ်ကို ခံစားနေရတာ ဖြစ်ပါတယ်။
ရွှေလီမြစ်ကမ်းဘေးမှာရှိတဲ့ ဒေသခံတွေရဲ့ ကြံခင်း၊ ပြောင်းခင်း၊ စပါးခင်းနဲ့ အခြားစိုက်ပျိုးခင်းတွေ ရေလွှမ်းမိုးခြင်းဒဏ်ကို ခံစားကြရသလို သဲထုတ်လုပ်ငန်းတွေနဲ့ ကမ်းကူးလုပ်ငန်းတွေအကုန်လုံး ရပ်နားကြရတယ်လို့ တအာင်းသဘာဝပတ်ဝန်းကျင်စောင့်ကြည့်ရေးအဖွဲ့ – TEWG က ထုတ်ပြန်ထားပါတယ်။
ဒေသခံအမျိုးသားတစ်ဦးက ” ဒီနေ့ နေပူတာတောင် ရေမကျဘူး။ ရေဒီလောက်ကြီးတာက မိုးရွာလို့ ရေကြီးတာမှမဟုတ်တာ။ အဲရေတွေက မူဆယ်ဘက်တို့ တရုတ်ဘက်က လာတဲ့ရေတွေပဲ။ နမ့်ခမ်းမြို့ပြင်က မန်ဆွမ်း၊ နောင်မာတာ၊ နောင်တိန်းတို့ တကြောပဲ ရေကြီးရေလျှံ အများဆုံးဖြစ်နေတာ။ အဲဘက်က ကြံခင်းတွေ စပါးခင်းတွေ အကုန်မြှုပ်တယ်။ မန်ဆွမ်းရွာဘက်ဆို ကချင်ပြည်က လာတဲ့ရေအော ဒီကရွှေလီမြစ်ရေအော အဲရွာမှာပဲ လာဆုံကြပြီး ရွှေလီတံတားဘက်ပြန်သွားတာ”
တရုတ်နိုင်ငံထဲ မိုးပြင်းထန်စွာ ရွာသွန်းမှုနဲ့ ရေကြီးရေလျှံမှုတွေကြောင့် မြန်မာနယ်စပ်အနီးမှာရှိတဲ့ တရုတ်နိုင်ငံထဲက ရေကာတာတစ်ခုကို ပြီးခဲ့တဲ့ ဇူလိုင် ၈ ရက်ကစပြီး တရုတ်က ဖွင့်ချဖို့ ထုတ်ပြန်ခဲ့ပြီးတဲ့နောက် ရွှေလီမြစ်ကမ်းဘေးမှာရှိတဲ့ နမ့်ခမ်းမြို့နယ်ထဲမှာ ရေတွေမြင့်တက်လာခဲ့ပါတယ်။
နောက်ထပ်အမျိုးသားတစ်ဦးက ” နမ့်ခမ်းကနေ မူဆယ်တက်တဲ့လမ်းဘက်မှာတော့ ဒီနေ့ ရေနည်းနည်းတော့ပြန်ကျတယ်။ မနေ့က အဲဒီလမ်းတလျောက်တွေမှာဆို စပါးခင်း၊ စိုက်ခင်းတွေ အကုန်မြှုပ်။ တောင်ကျရေတွေကျ မြစ်ရေကလည်းတက်နေတာဆိုတော့ လယ်သမားတွေ အကုန်ဆုံးရှုံးပြီလေ”
ဒါ့အပြင် အဲဒီ ရွှေလီမြစ် ရေကြီးမှုကြောင့် ဓာတ်ဆီတင်ယာဉ်တွေလည်း ဝင်ရောက်မလာနိုင်တဲ့အတွက် နမ့်ခမ်းမြို့မှာ ဓာတ်ဆီပြတ်လပ်လာပြီး ဆီဆိုင်တွေကလည်း ဓာတ်ဆီကို အကန့်အသတ်နဲ့သာ ရောင်းချနေရတာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
