မိုင်းပန်ပျော်၊ ဇန်နဝါရီ ၃၀ ရက်၊ မန်စံ
တအာင်းတပ်မတော်- TNLA ထိန်းချုပ်ထားတဲ့ နမ္မတူမြို့နယ် မန်စံကျေးရွာမှာ ကားနဲ့ စက်ဘီး တိုက်မိလို့ စက်ဘီး မောင်းတဲ့ အမျိုးသားတစ်ဦး အပြင်းအထန် ဒဏ်ရာ ရခဲ့ပါတယ်။
ဖြစ်စဉ်ဟာ မနေ့ ဇန်နဝါရီ ၂၉ ရက် ညနေ ၅ နာရီကျော်က နမ္မတူ-မန်စံကြားမှာ ယာဉ်တိုက်မှု ဖြစ်ပွားခဲ့တာလို့ ရွှေဖီမြေရဲ့သတင်းရင်းမြစ်တစ်ဦးက ပြောပါတယ်။
“စက်ဘီး မောင်းတဲ့လူက ခေါင်း ထိသွားတာ။ ဘယ်သူ မှားတာလဲ မသိတော့ဘူး။ ငါတို့ ဟိုမှာရောက်တော့ လူပြည့်နေတာ။ ဘယ်လို တိုက်တာလဲ မသိဘူး ကားအရှိန်များတာလား မသိဘူး”
လက်ရှိမှာတော့ ကားနဲ့တိုက်ခံရတဲ့ စက်ဘီးမောင်းသူကို မန်စံ ဆေးရုံမှာ မကုသနိုင်လို့ လားရှိုး ဆေးရုံဘက် နမ္မတူရှိ အရေးပေါ်လူနာတင်ယာဉ်နဲ့ လွှဲပြောင်းထားပြီး ဘယ်သူလဲဆိုတာကိုတော့ မသိရသေးဘူးလို့ ပြောပါတယ်။
ကားမောင်းတဲ့ အမျိုးသားဟာ အသက် ၄၇ နှစ်အရွယ်ရှိတဲ့ ကျော်နိုင်ဦးဆိုသူဖြစ်ပြီး မန်စံမှာ ဖွင့်လှစ်ထားတဲ့ တရုတ်ကျောင်းမှာ ကျောင်းဆရာတာဝန် ထမ်းဆောင်နေသူ ဖြစ်တယ်လို့ ၎င်းက ဆက်ပြောပါတယ်။
ကားမောင်းတဲ့ အမျိုးသားကို TNLA ရဲ့ ရဲတပ်ဖွဲ့က မန်စံ ရဲစခန်းမှာ ထိန်းသိမ်းထားတယ်လို့ ဆိုပါတယ်။
အလားတူ မူဆယ်မြို့မှာလည်း ပြီးခဲ့တဲ့ ဇန်နဝါရီ ၁၀ ရက်က ကားနဲ့ဆိုင်ကယ် ယာဉ်တိုက်မှု ဖြစ်ပွားပြီး ကလေး ၂ ဦး သေဆုံးခဲ့တဲ့ဖြစ်စဉ်လည်း ဖြစ်ပွားခဲ့ပါတယ်။
