ရွှေဖီမြေ၊ ဇူလိုင် ၂ ရက်၊ မင်းတပ်
ပြီးခဲ့တဲ့ မေလ ၁၆ ရက်ကစပြီး ချင်းပြည်နယ် မင်းတပ်နဲ့ကန်ပက်လက်မြို့နယ်ဘက် အင်အားထောင်ချီနဲ့ စစ်ကြောင်း ထိုးလာတဲ့ စစ်ကောင်စီတပ်ကို ချင်းတော်လှန်ရေးတပ်တွေက တိုက်ခိုက်ခဲ့ကြပါတယ်။
ချင်းပြည်သူ့တပ်မတော်- CPA၊ ယောဒေသမှ တော်လှန်ရေးတပ်တွေဖြစ်တဲ့ YDF၊ YA အပါအဝင် အခြားမဟာမိတ်တပ် အတူတကွ ဟန့်တားတိုက်ခိုက်ခြင်း၊ တန်ပြန်ထိုးစစ်ဆင်ခြင်းနဲ့ တိုက်ခိုက်ချေမှုန်းခဲ့လို့ စစ်တပ်ဘက်က ရာချီ သေဆုံးကာ ဖွဲ့စည်းပုံပျက်ပြီး တပ်လန်ကျသွားတယ်လို့ CPA က ဒီနေ့ ဇူလိုင် ၂ ရက် မနက်ပိုင်းမှာ သတင်းထုတ်ပြန်လာပါတယ်။
၁ လကျော် ကြာလာပြီဖြစ်တဲ့ ပြင်းထန်တဲ့တိုက်ပွဲအတွင်း စစ်တပ်ရဲ့ အလောင်းနဲ့ သုံ့ပန်းအပါအဝင် လက်နက်ခဲယမ်းတွေကိုလည်း သိမ်းဆည်းရမိခဲ့တယ်လို့ ဓာတ်ပုံနဲ့တကွ ထုတ်ပြန်ထားပါတယ်။
စစ်ကောင်စီ စစ်ကြောင်းဟာ ယောဒေသ ဆောမြို့နယ်ကို ဖြတ်ပြီး အင်အား ထောင်ချီနဲ့ ချင်းပြည်ဘက် ထိုးစစ်ဆင်နေတာပဲ ဖြစ်ပါတယ်။
မြေပြင်တိုက်ပွဲမှာ အထိနာနေတဲ့ စစ်တပ်ဟာ စစ်ရေးပစ်မှတ်၊ အရပ်ဖက်ပစ်မှတ်တွေကို မခွဲခြားဘဲ လေကြောင်း၊ လက်နက်ကြီး၊ ဒရုန်းနဲ့ ရမ်းသန်းပစ်ခတ်မှုကို နေ့စဉ် ကျူးလွန်နေတဲ့အတွက် လူထုတွေရဲ့ အသက်အိုးအိမ် ထိခိုက်ခဲ့တဲ့အပြင် အမျိုးသမီးနဲ့ကလေးသူငယ်အပါအဝင် အပြစ်မဲ့ အရပ်သားတွေလည်း ထိခိုက်ခြင်းနဲ့ သေဆုံးတာတွေ ဆက်တိုက် ဖြစ်ပွားနေတယ်လို့ ဆိုပါတယ်။
CPA အနေနဲ့ မဟာမိတ်ပူးပေါင်းတပ်၊ လူထုတွေနဲ့ လက်တွဲပူးပေါင်းပြီး နယ်မြေ ကျူးကျော်လာနေတဲ့ စစ်တပ်ကို အရှိန်အဟုန်မြှင့်တင်ပြီး နည်းလမ်းပေါင်းစုံနဲ့ အဆုံးထိ ခုခံတွန်းလှန်သွားဖို့ သန္နိဌာန်ချကာ တော်လှန်နေတယ်လို့ ထုတ်ပြန်ချက်ထဲ ဖော်ပြထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
