ပိုႈလဘား၊ ကျံရ်မေ ဆငည်း 1၊ မူစယ်
ဘိူန်းအယ်နံပ်တတိုအီးခေဲင်အရာပ်ကဲဒါႈ လာင်ယာန်ပ်ုန်ပျိူဝ်ႇခယ်ကဲတ ကနာည်နှာင်းပဲန် ရောင်လိုင်းကအူရ် ကဒါႇခယ်ကဲနီန် ဟည်ရောတ်စာ်မ်း ရီမ်းကီုင်းမူစယ် ကပီုန်ဆျှံမ်ကဒါႇပိူည် အ်ုန်အီမိုႈဒီပ်ုန်ထိင်ခြဲအူန်း တံပ်ကညာအာဏာဆီုက်ဇေဝ်ကဲ ပကအူရ်ကုင်ခယ်ကာည်း ကုင်ကပိုမ်ဘြာန်နီန်အောႏ။
ကောန်အီမာည်း ကဝ်အီဂေါည်ခေဲင်အရာပ်ဒီန်အူအီး က္လာင်းဒါႈ ရံင်လာင်ယာန်ခယ်ကဲနီန် ဟည်ရောတ်စာ်မ်း ခေဲင်ကီုင်းမူစယ် ပပါင်ဘောလ်ခ္လုင် အီဂေါည်ရီမ်းက္လာႈမံင်ဂလာမူစယ်နီန်ယာ့်အောႏ။
“ဆာ်မိုႈရီမ်းနဒီဆျှိုည်လီနီန် အ်ုန်လီပ်ကဒါႇကုင်ကပိုမ်ဘြာန်ဒီးကော်။ အာည်ႇနီန် ကဲပျိူဝ်ႇအူန်းလိူည် လာင်ယာန်ကဲ ဒိူဝ်ႇပါင်ဘောလ်ခ္လုင်ဒီန်။ ဆန်ုမ်နီန် ကဲဟည်ကထူတ်ဒေဲႈဘိုး ယိူဝ်ႇပါင်ဘောလ်ခ္လုင်ဒီန် အူမဲင်ႏ ဟည်ဒေဲႈပျိူဝ်ႇဘိုး ရံင်လာင်ယာန်အူလှေ။ ပါင်ဘောလ်ခ္လုင်ဒီန် အ်ုန်မိုႈလိူည် ဒီကျာင်းယဲတ ဟာဝ်းကစူႈဆေဆေ။ ခယ်ကဲ ဆာ်မိုႈဒီနံင်လာည်းကဲတကတာည်း ကဲပျိူဝ်ႇအူန်းဆဲ့လာင်ယာန်ရအာည်ႇ”
ကောန်အီမာည်းဒီန် ဆီုပ်က္လာင်းဒါႈဘိုး ခယ်ကဲ ကဲနံင်ဒေဲႈပျိူဝ်ႇဖါ်ႈ ရံင်လာင်ယာန်ကဲ တောပ်ရောင်လိုင်းကအူရ် အီကစာပ်တကအူရ်ကီုင်းမူစယ်နီန်ရအာည်ႇ ဟောည်ႇဒီန် ကဲစီနံင်ရောင်လာ်ရောင်လိုင်းနီန်အောႏ။
ဒီစိင်ဒေဲႈ ခယ်ကဲတရောင်လိုင်းကမာည်းနီန် ဆဲႈဒါႇကီုင်းမူစယ် အ်ုန်အီမိုႈကအူရ်ကုင်ခယ်ကာည်း ကုင်ကပိုမ်ဘြာန်နီန် ကဒါႇချင်းရွှေဟော်၊ ကြူကုတ် (ပါင်ဆာင်း) အ်ုန်အီမိုႈဒီပ်ုန်ထိင်ခြဲအူန်း တံပ်ကိုးကာင်း – MNDAA ကဲကာည်း နမ့်တစ် (မန်ခါး) အ်ုန်အီမိုႈ ဒီပ်ုန်ထိင်ခြဲအူန်း UWSA ကဲမာ်တောပ်အေ့အောႏ။
ဘည်စိင် ရောင်ကစံပ်ခယ်ကဲတရောင်လိုင်းနီန် တိုအီးခေဲင်အရာပ်ကဲ ဘိူန်းဟြာင်းတေဲင်အောန်လဲင်မာ် တောပ်ပည် တံပ်ကညာအာဏာဆီုက်ဇေဝ် MNDAA ကာည်း UWSA ကဲမာ် အာဝ်ယိူဝ်းစိ ဘည်ႎှါင်းဒေဲႈကဲအောႏ။
ဆဲႈဒါႇဒီန် မိူဝ်ႈဘိုးဘည်ပ္လူႈဆဒိ က္လာင်းအူန်း တံပ်ကညာအာဏာဆီုက်ဇေဝ်ကဲ တမီဒီယာ အီဂေါည်ခေဲင်ကုင် နှာရိူဝ်ႇကုင်ကဲနီန် နှာင်းအာဝ်ဟြာင်းဆဒါင် ဘည်စိင်ဒေဲႈခယ်ကဲတ ကအူရ်ရောင်လိုင်းကဲနီန်အောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
