အလင်း၊ ဇွန်လ ၂၃ ရက်၊ တမူး
စစ်ကိုင်းတိုင်း၊ တမူးမြို့နယ်၊ ခမ်းပတ်မြို့ရှိ ကနန်ကျေးရွာကို စစ်ကောင်စီက လေကြောင်း ဗုံးကြဲ တိုက်ခိုက်လို့ အရပ်သားတစ်ဦး သေဆုံးခဲ့ပြီး နေအိမ်အများအပြား ပျက်စီးသွားခဲ့တယ်လို့ ဒေသခံတွေက ရွှေဖီမြေသို့ ပြောပါတယ်။
ခမ်းပတ်မြို့ကို ပြန်လည်ထိန်းချုပ်ထားတဲ့ စစ်ကောင်စီဟာ မနေ့ ဇွန်လ ၂၂ ရက်နေ့၊ နေ့လယ် ၁ နာရီခန့်မှာ ဂျက်တိုက်လေယာဉ်နဲ့ ခမ်းပတ်မြို့နဲ့ ကနန်ရွာအနီးဝန်းကျင်ကို ပစ်မှတ်ထား လေကြောင်း ဗုံးကြဲတိုက်ခိုက်ခဲ့တာ ဖြစ်ပါတယ်။
“ခမ်းပတ်မြို့ ရပ်ကွက်တချို့နဲ့ ခမ်းပတ်အနားက ကန်န်ရွာတို့ကို တဆက်တည်းဗုံးကြဲတာပါ။ လေယာဥ်နဲ့ ဗုံးလာကြဲတဲ့ချိန်မှာ လူတွေက ပြေးချိန်တောင် မရလိုက်ဘူး။” လို့ ခမ်းပတ်ဒေသခံတစ်ဦးက ရွှေဖီမြေသို့ ပြောပါတယ်။
အဲဒီ လေကြောင်း တိုက်ခိုက်မှုအတွင်း အသက် (၃၄) နှစ်အရွယ် ကနန်ရွာသား ချင်းလူမျိုး Lalpanmawia မှာ ဗုံးစထိမှန်၍ နေရာမှာ သေဆုံးခဲ့ပါတယ်။
စစ်ကောင်စီရဲ့ လေကြောင်း တိုက်ခိုက်မှုနဲ့ စစ်ကြောင်းထိုး နေအိမ်တွေ မီးရှို့တာကြောင့် ဒေသခံတွေဟာ အသက်လုထွက်ပြေးနေရတဲ့အတွက် အလောင်းကို ပစ်ထားခဲ့ရတယ်လို့ သိရပါတယ်။
“အရပ်သားတွေက တိုက်ပွဲကြားမှာ ပိတ်မိနေတာ၊ လေကြောင်းတိုက်ခိုက်မှုတွေကြောင့် အသက်လုပြီး ပြေးနေရတဲ့အတွက် သေဆုံးသူရဲ့ အလောင်းကိုတောင် မိသားစုဝင်တွေက မသင်္ဂြိုဟ်နိုင်ဘဲ လူမှုကူညီရေးအသင်းကပဲ အကူအညီပေးလိုက်ရတယ်” လို့ ခမ်းပတ်ဒေသခံတစ်ဦးက ရွှေဖီမြေသို့ ပြောပါတယ်။
တိုက်ခိုက်မှုကြောင့် ရပ်ကွက် (A) နဲ့ ရပ်ကွက် (C) တို့မှာ လူနေအိမ် အဆောက်အအုံများစွာ ပျက်စီးခဲ့ရပါတယ်။
ဒါ့အပြင် ဇွန်လ ၂၁ ရက်မှာလည်း ခမ်းပါတ်မြို့မှာ တိုက်ပွဲဖြစ်ပွားစဉ် အမှတ် (၄) ရပ်ကွက်မှ ဒေသခံတစ်ဦးကို စစ်ကောင်စီတပ်က ဖမ်းဆီးပြီးနောက် အမှတ် (၃) ရပ်ကွက်မှာ ပစ်သတ်ခဲ့တယ်လို့ စုံစမ်းသိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
